Print this page

Şaredarî dadikeve kolanan û guh dide daxwazên gel

Şaredariya Bajarê Mezin a Amedê, di çarçoveya amadekirina Plana Stratejîk a 5 salan de bi vekirina standên li kolanan guh dide daxwazên gel.

Civîn û xebatên ku ji bo gel, keya, saziyên sivîl, hevşaredar û endamên meclîsan, sazî û dezgehên cemaweriyê yên li 17 navçeyan tevlî amadekirina Plana Stratejîk a 2025-2029an bibin, ji aliyê Şaredariya Bajarê Mezin ve hatin destpêkirin, dewam dikin. Li gorî pêşniyar û daxwazên ku di encama xebatên ku bên kirin de hatine berhevkirin dê Plana Stratejîk a 5 salan bê amadekirin.

Di çarçoveya van xebatan de Midûriyeta Şaxa Pêşxistina Stratejiyê ya Serokatiya Daîreya Xizmetên Darayî li gelek nuqteyên bajêr standan vedike û hêviyên gel dipirse.

Di çarçoveya projeyê de li navçeyên Sûr, Kayapinar, Baxlar û Yenîşehîrê 4 roj e bi roj û êvarê li standên vekirî daxwazên gel tên pêşwazîkirin. Xalên ku forma daxwaz û xwestek tê de têne danîn ev in: “Parka Koşuyolu, li ber Mizgefta Mezin, Parkorman, Kolana Huner, Parka Newrozê, Cadeya Gazî, Parka 75, NINOVA AVM, Kuçeya dergeyê Nû, WINSTON AVM, Kolana Ekinciler, Parka Goletli, Li ser Pira Dehderî, Ceylan AVM, Forum AVM. ”

'Ez pir kêfxweş bûm'

Welatiyên ku di forma daxwaznameyê de nêrîn, pêşniyar û daxwazên xwe nivîsandin diyar kirin ku ew ji serlêdanê memnûn in û spasiya Şaredariya Bajarê Mezin kirin.

Meltem Sencan, anî ziman ku daxwazên wan ên ji aliyê Şaredariya Bajarê Mezin ve hatin pêşwazîkirin, û wiha got: “Ez di kolana hunerê re derbas dibûm. Min stand dît û bala min kişand. Ez çûm standê û wan daxwazên min girtin. Ez pir kêfxweş bûm. Hêvîdar im ku daxwazên ku min nivîsîbûn pêk bên. Ez gelek spasiya Şaredariya Bajarê Mezin a Amedê dikim.”

Ji welatiyan Baran Balkaya jî wiha got: “Ez li Amedê dijîm. Dema derbas dibûm min stand dît. Şaredariya Bajarê Mezin daxwaz û pêşniyarên min wergirtin. Ez pir kêfxweş bûm." 

Yusuf Bayrak weha got, “Beriya vê şaredariyê qeyûm hebû. Em diçûn wir û digotin, lê kes eleqedar nebû. Niha pir baş e. Me gazincên xwe ragihandin. Ez hêvî dikim ku ew ê bibe." 

Daxwaz bi rêya medyaya civakî jî tên wergirtin

Şaredariya Bajarê Mezin a Amedê jî di çarçoveya Plana Stratejîk a 2025-2029an de lêkolîneke anketê ya bi navê "Bandor û feraseta xizmetên li ser civakê" amade kir. Anket ji bo ku li ser malpera Şaredariya Amedê û hesabên medyaya civakî bigihîje her kesî hate çêkirin. Forma anketê mimkûn e ji malper û hesabên medyaya civakî bêt bidestxistin.

Welatî dikarin ji lînka jêrîn xwe bigihînin anketê:

https://www.diyarbakir.bel.tr/anket