Hemşaredarê Şaredarîya Amedî ya Şaristanê Girdî Dogan Hatunî, Baxçeyê Miletî yê Yenîşehîrî ke şaredarîye girewtbi, kontrol kerd û seba miqate û tamîrî beşê eleqedarî wezîfedar kerdî.

Şaredarîya Şaristanê Girdî, Baxçeyê Miletî yê Yenîşehîrî ke hetê Wezaretê Derûdor, Bajarwanî û Vurîyayîşê Îklîmî ra TOKÎyî rê ameybî viraştene, peyser girewt. Hemşaredarê Şaredarîya Şaristanê Girdî Dogan Hatunî ke Baxçeyê Miletî de kontrolî kerdî, berpirsîyarê şîrketê muteehidî reyde qisey kerd û waşt ke kêmaneyê Baxçeyê Miletî bêrê safîkerdene.

Hemşaredar Hatunî, seba ke şar bieşko bêproblem Baxçeyê Miletî ra îstîfade biko, serekê daîreyanê eleqedaran seba miqate û tamîrê 'rayîrê peyaşîyayîşî, bankanê roniştişî, hewze, sîstemê awdayîşî û cayê keskî' wezîfedar kerdî.

Kontrolê Baxçeyê Miletî de Hetkarê Sekreterê Pêroyî Ozgur Yildiz û serekê daîreyan Hemşaredare Hatun reyde bîyî.