Meclîsê Şaredarîya Amedî ya Şaristanê Girdî bi hawayêko yewvengî qerar girewt ke citkaranê taxanê dewan ê 17 qezayan rê 50 hezar şitilê meyweyan bêrê dayene.

Meclîsê Şaredarîya Şaristanê Girdî ke kombîyayîşê adetî yê Teşrîna Peyêne roniştişan reyde dewam keno, roniştişê verên vera şaredarîye de şarî rê akerde kerd û seba citkaran qerarê hetkarîye girewt.

Kombîyayîşî de teklîfê girewtişê 50 hezar şitilanê meyweyan (goz, vame, saye, murîye, beyi, zerdalî, alicî, xoxe), vilakerdiş û protokolê ke do şaredarîyanê qezayan reyde bêro viraştene û îmzakerdene ame nirxnayene.

Qerar bi yewvengîye ame girewtene

Seba ke hetkarîye bidê citkaranê taxanê dewan ê 17 qezayan ke rewşa înan a maddî weş nîya, maddeyê ke goreyê şertanê îklîmî yê qezayan 50 hezar şitilê meyweyan bêrê girewtene, vilakerdene û protokol şaredarîyanê qezayan reyde bêro viraştene û îmzakerdene, bi yewvengîye ame qebulkerdene.