Ekîbê Şaredarîya Amedî ya Şaristanê Girdî bi munasebetê 18-24ê Adare Hewteyê Hurmetê Pîran û Roşanê Remazanî ke nêzdî beno, kesê ke emrê înan aver o, keyanê înan de zîyaret kerdî û paketê roşanî vila kerdî.

Mudirîya Şefîya Xizmetê Pîran ya girêdayeyê Serekîya Daîreya Xizmetê Kesanê Astengdar û Pîran, kesê ke 60 serrî ra pîrêr ê û tena ciwîyenê yan zî hewcedarîya înan a pawitişî est a, înan rê her tewir hetkarîyan kena; kontrolê weşîye ra heta nîyadayîşê şexsî, pakkerdişê keyeyî ra heta hetkarîya malzemeyanê tibîyan.

Mudirîya Şefîya Xizmetê Pîran, seba ke kesê ke emrê înan aver o, xo erjaye hîs bikerê, hedef kerdo ke xo biresnê 400 keyeyan.

Paketê roşanî ke sifteyî qezayanê Sûr û Kayapinarî de ameyî vilakerdiş, hetê keyeyan ra bi memnûnîyet ameyî qebûlkerdiş.