Şaredarîya Amedî ya Şaristanê Girdî bi xebata grûba 14. ke organîze kerd, çarçewaya KÎHEP de babeta "Cinî û Sîyaset" ame munaqeşakerdiş.

Serekîya Daîreya Xizmetê Cinî û Keyeyî, Programê Perwerdeyê Heqanê Merdimîye yê Cinîyan (KÎHEP) ke bi hemkarîya Komela Heqanê Merdimîye yê Cinîyan (KÎH) dest pêkerdo, 14 hewteyî xo dima verdayî.

Perwerdekara KÎHEP'î Rojda Kizgin ke xebata grûbe kerd, va ke xebate de ameyo munaqeşakerdiş ke çira temsîlkerdişê cinîyan qada sîyasî de lazim o, çira camêrdî nêeşkenê qada sîyasî de cinîyan temsîl bikerê û kamcîn astengî vernîya cinîyan de est ê ke sîyasetî de ca bigîrê.Kizgin ke muhîmîya hemparîya cinîyan ser o zî vinderte, wina va:

"Ma nêşenê destûr bidê ke mîyanê ma cinîyan de neseypêyî bêro viraştene kesanîyetê ma yê cîyayan ser o. Ma eşkenê bi xurtkerdişê têkilîyanê hemparîye mîyanê xo, cuye heta ke bêro kerdiş, seba yewbînan asan bikê. Ganî ma dîqet bikê ke her gamê ke cinî erzenê, înan rê piştî bêro dayene."

Xebats ke hewteyêk de rojêk û 4 saetan grûba girewteyî de yena viraştene, hewteyanê verênan de nê babetî munaqeşa bîyî: "Heqê Merdimîye yê Cinîyan, Heqê Qanûnê Bingeyin û Medenî, Şîdetê Vera Cinîyan û Şîdetê Keyeyî, Stratejîyê Vera Şîdetî, Heqê Ekonomîkî yê Cinîyan, Pêwendî, Perwerdeyê Domanan ke Rolê Cinsiyetê Komelkî Şinasno û Heqê Domanan, Cinî û Cinsîye, Cinî û Heqê Dayîkbîyayîşî."