Hemşaredara Şaredarîya Amedî ya Şaristanê Girdî Serra Bucak, Hemsereka Pêroyî ya DEM Partî Tulay Hatîmoğullarî reyde Şaredarîya Îstanbulî ya Şaristanê Girdî rê zîyaretê hemparîye kerd.

Hemsereka Pêroyî ya Partîya Seypêyî û Demokrasîya Şaran (DEM Partî) Tulay Hatîmoğullarî û Hemşaredara Şaredarîya Amedî ya Şaristanê Girdî Serra Bucak heyetê xo reyde, seba destbendkerdişê Hemşaredarê Şaredarîya Îstanbulî ya Şaristanê Girdî (ÎBB) Ekrem Îmamoğluyî ÎBB'yî zîyaret kerdî.

Bucak û heyeto ke reyde bî, hetê Serekê Pêroyî yê CHP’yî Ozgur Ozelî ra ameyî pêşwazîkerdiş.

Badê kombîyayîşê ke awanîya şaredarîye de ame viraştene Hemsereka Pêroyî ya DEM Partî Hatîmoğullarî û Serekê Pêroyî yê CHP Ozelî beyanat da. Ozelî sipasîya xo heyetê DEM Partî rê kerd ke zîyaretê hemparîye kerd û bale ant muhîmîya hemparîye ser o.

Hatîmoğullari zî va ke çîyê ke ameyê ciwîyayene qebûl nêbenê û îlawe kerd: "Ma wazenê ke Rêzdar Îmamoğlu û kesê ke reyde destbend ê, cade bêrê veradayene. Ma do seba demokrasî û aştî hemparîye de bibê."