Hevserokên Şaredariya Bajarê Mezin a Amedê Serra Bucak û Dogan Hatûn, di çarçoveya xebatên Plana Stratejîk de bi muxtarên navçeyên Farqîn, Licê, Pasûr û Hezroyê re kom bûn. Hevserok Bucak diyar kir ku rejîma qeyûm a ku bi demokrasiya xwecihî re nagunce, rejîmeke desteserker e, Hevşaredar Hatûn jî bal kişand ser rûxandina qeyûman di nava 8 salan de.
Civînên ku ji aliyê Şaredariya Bajarê Mezin a Amedê ve ji bo gel, keya, saziyên sivîl, hevşaredar û endamên meclisê, sazî û dezgehên cemaweriyê yên li 17 navçeyan di amadekirina Plana Stratejîk a 2025-2029an de cih bigirin, dabûn destpêkirin berdewam dikin. Hevşaredara Bajarê Mezin Serra Bucak û Dogan Hatûn bi muxtarên navçeyên Farqînê, Licê, Pasûrê û Hezroyê re hatin cem hev û hevdîtinên keyayan bi dawî kirin. Hevşaredarên Farqînê Sevîm Bîçîcî û Kadrî Esen, Hevşaredarên Pasûrê Fatma Ay û Murat Îpek, Hevşaredara Licê Diyar Dîlek, Endama Meclîsa Şaredariya Hezroyê Hasîbe Yazdîk, Alîkarê Sekreterê Giştî yê Şaredariya Bajarê Mezin Reşat Bakan, li avahiya Navenda Çand û Kongreyan bi beşdariya beşên pêwendîdar ên Midûriyeta Giştî ya DÎSKÎyê û muxtarên taxan civiyan.
Hevserok Hatûn: Em ê pêşniyaran bigrin û Planeke Stratejîk çêbikin
Hevşaredar Hatûn di civîna ku bi muxtarên navçeyên Farqînê û Hezroyê re axivî û diyar kir ku ew plansaziya Stratejîk a 5 salan amade dikin û got, “Em ê li ser projeyên xwe biaxivin û li ser kêmasiyên xwe bisekinin. Em ê ne tenê li ser rê û avê, herweha li ser her pirsgirêka bajarê xwe bi we re bişêwirin. Em ê bi pêşniyar û daxwazên ji bo çandinî, sewalkarî, kooperatîf û çand û hunerê li parêzgeha xwe planeke stratejîk çêbikin."
'DÎSKÎ dê pirsgirêka avê ya 17 taxan çareser bike'
Hatûn bal kişand ser pirsgirêka ava vexwarinê û wiha got: “Qeyûman di 8 salên dawî de wêraniyeke mezin li dû xwe hiştin. Gelek gundên ku berê ava wan hebû, ji ber ku depoyên wan ên avê nehatine nûkirin û nûkirina pêwîst nehatine kirin, pirsgirêka avê dijîn. Li nêzî hezar û 500 gund û gundikan pirsgirêka ava vexwarinê heye. DÎSKÎyê ji bo vê planeke mezin çêkir. Wê pirsgirêka avê ya 17 navçeyan çareser bike. DÎSKÎ ewil dê bi çareserkirina pirsgirêka gundên bê av dest pê bike. Em ê hemû pirsgirêkên xwe bi we re çareser bikin.”
Muxtaran ji bo çandina fistiqan piştgirî xwest
Di civînê de muxtaran pirsgirêkên binesaziyê û avahîsaziyê yên li taxan vegotin û der barê Plana Stratejîk a 5 salan de nêrîn û pêşniyarên xwe anîn ziman. Muxtaran bi daxwaza çareserî ji bo malên terikandî yên xeternak ên li gundan, ji bo pêşxistina çandiniya fistiqan û çandina daran li navçeya Hezroyê piştgirî, daxwaza vekirina kursên ji bo jinan, avakirina bêrm û hewzên avdana zeviyên çandiniyê û seferên komsiwariyê bo gundên xwe kirin.
'Em ê li gundê we bibin mêvan'
Li ser pirsa muxtarê Gundê Cumata navçeya Farqînê Şahîn Orûç, ku got bi salan e gundê wan bê servîs e û hatiye terikandin û Hatûn wiha got: “Em ê bi hemû rayedarên xwe û midûrên xwe re bên gundê we, bibin mêvanên we, em ê pirsgirêkan di cih de bibînin."
Hevşaredar Hatûn diyar kir ku yên bazirganiya çandiniya fistiqan dikin dê petromeya xwe bi xwe bikin û got ku şaredarî dê kesên li taxan nikarin debara xwe bikin petrome bike.
Hevşaredar Bucak: Budçe veguherî rewşa rantê
Di civîna ku keyayên navçeyên Licê û Pasûrê lê amade bûn de Hevşaredar Serra Bucak axivî û ji muxtarên ku dê 5 salan xizmetê bikin di karê xwe de serkeftin xwest. Bucak, destnîşan kir ku ew li ser Plana Stratejîk a 5 salan xebatên xwe didomînin û got ku di heyama qeyûm a 8 salan de dema li îhaleyan mêze kirin wan dît ku butçeya gel veguheriye rantê.
'Rejîma qeyûm rejîma dagirkeriyê ye'
Bucak, tayînkirina qeyûm li Şaredariya Colemêrgê şermezar kir û diyar kir ku rejîma qeyûm rejîmeke desteserkirinê ye. Bucak di berdewamiya axaftina xwe de wiha got: “Em gelek caran tekez dikin ku qeyûm bi demokrasiya xwecihî re li hev nakin û em difikirin ku divê hikûmet dev ji vê ferasetê û sîstemê berde, em dibêjin, bi dengekî bilind diqîrin. Muxalefeteke girîng a ku bi me re ye, erênî û kêfxweş e. Hem li Enqereyê, hem di korîdorên siyasî de û hem jî zêdetir li herêmê divê deng û ramanên me bibin yek. Tenê vebijarkek me heye ku em bibin yek: Em vê derbeya li demokrasiya herêmî qebûl nekin. Ji bo ku xizmetên herêmî ji aliyê hevserokên şaredarî û meclîsên şaredariyê yên hatine hilbijartin ve bên kirin. Ez di wê baweriyê de me ku ger em di vê mijarê de bibin yek, ger em karibin mafên xwe biparêzin, ger em careke din herêmên xwe yên desteserkirî rizgar bikin, em dikarin di 5 salên pêş de zirara 8 salan sererast bikin.”