Nivîskara Şanoyê Sîmîn Çayçî ku beşdarî sohbeta ku di çarçoveya çalakiyên Rojên Şanoya Jinan ya Amedê de hat lidarxistin bû, li ser helwesta xwe ya li hemberî tundiyê û awayê derbaskirina astengiyên ji aliyê rejîmê ve li bajarê Sîneyê diyar kir ku ew derdên xwe bi rêya şanoyê tînin zimên.
1'emîn Rojên Şanoya Jinan ya Amedê ku ji aliyê Şanoya Bajêr a Şaredariya Bajarê Mezin a Amedê (DBŞT) ku di bin banê Serokatiya Daîreya Çand û Karên Civakî de xebatên xwe dimeşîne, di roja sêyemîn de bi çalakiyan berdewam dike. Di çarçoveya çalakiyan de li Navenda Çand û Kongreyê ya ÇandAmedê bi sernavê "Giringiya şanoyê di Jiyana Jinan de û bandorên wê yên erênî yên li ser ramanê û civakê” axaftinek hat kirin.
Seroka Daîreya Çand û Karûbarên Civakî Zeynep Yaş, axaftina Nivîskara Şanoyê Sîmîn Çayçî ya ji bajarê Sîne yê Îranê kir, wergerand.
Çayçî ku bi giştî çîroka jinên li Sîneyê yên dest bi şanoyê kirin vegot û diyar kir ku ji sala 1967an heta îro jinan pirsgirêkên xwe anîne qada şanoyê. Çayçî, behsa mafên jinan, helwesta wan a li dijî tundiya li ser jinan, û çawaniya derbaskirina wan astengiyên ku ji aliyê rejîma nû ve hatine danîn, bi riya zimanê bedenê, bi riya şanoyê pêşkêş kir. Çayçî got, “Jin bi nivîsandina şanoyên wêrek û zimanê bedenê li ser dikê pirsgirêkên civakî anîn ser dikê. Bi vê cesareta ku jinan nîşan da, mêran jî bi awayekî bi bandortir sehneya şanoyê bi kar anîn.” Çayçî got ku di salên 1990î de dema ders dida zarokên kêmbîn û guhê xwe yekem şanoya xwe ji bo zarokan nivîsî û wiha got: “Piyesa Xalxalok, Şaxê Mişkan a ku min bi çîrokbêjiya gelêrî ya kevneşopî vegot, bandoreke mezin li ser zarok û civakê kir. Ev şanoya ku jin di her qonaxê de amade bûn, ji derhêneriyê heta şanoyê 65 caran hat lîstin. Ev şano ku bi zimanekî muzîk û helbestî hatiye nivîsandin, di festîvala Seqizê de 9 xelat wergirtine.”
Çayçî destnîşan kir ku wan heta asta lîseyê ji bo vê yekê têkoşiya û piştre mîsyonek û qatek hunerî hate avakirin û malbatên rewşenbîr ên bi bandor ên civakî keçên xwe şandin dibistanê û di warê balet, muzîk û şanoyê de perwerde kirin.
Yekemîn lîstika jinan Sevê
Çayçî behsa şanoya Sevê kir ku piştî salên 1990î ji bo balê bikşîne ser têkiliya ensest ya di nava malbatê de nivîsandiye. Çayçî, da zanîn ku ensest birîneke civakê ya gelekî girîng e, her çend di nava civakê de qet behsa wê nayê kirin jî. Çaycî diyar kir ku ev yekemîn lîstika jinê ye ku ji bo hişmendiya civakî zêde bike nivîsandiye.
Çayçî bal kişand ser girîngiya şanoya kuçeyan jî, lîstikên ku rû bi rû tên lîstin bi taybetî li Merîwanê di têkiliyên civakî de xwedî nirxeke mezin in. Çayçî aşkere kir ku bi taybetî jinên ku koçî Ewropayê kirine, jinên Rojhilata Navîn li hemberî tundiya li ser jinê û binpêkirinên mafên jinan bêdeng namînin, bi şanoya kolanan van tiştan îfade dikin û rasterast bi hev re têdikoşin.
Yaş: Em jinan bo şanoyê gazî dikin
Seroka Daîreya Çand û Karûbarên Civakî Zeynep Yaş, piştî hevpeyvînê bi dayîna plaketê spasiyên xwe pêşkêşî Çayçî kir û destnîşan kir ku di rojên şanoyê de temaşevan bi meraq û bi baldarî beşdar bûn. Yaş, da zanîn ku dê rojên Şanoya Jinan heta roja Yekşemê bidome û ew hemû jinên bajêr gazî temaşekirina şanoyê dikin.
