Şaredariya Bajarê Mezin a Amedê, bi armanca hilberandin, parastin û belavkirina tovên herêmî di hilberînê de bi kar bîne Pirtûkxaneya Tovî ava dike.

Daîreya Guhertina Avhewa û Sifir Bermayî armanc dike ku bi Pirtûkxaneya Tovî ya ku dê di nav Dibistana Avhewayê ya Agroekolojiyê de çêbike, tovên herêmî berhev bike, biparêze û bi kar bîne. Bi saya vê pirtûkxaneyê wê pirtûkxane bi tovên hatine berhevkirin dewlemend bibe û mîraseke girîng ji nifşên pêşerojê re bê hiştin.

Pirtûkxaneya Tovî ya ku dê bînin Amedê dê li kampusa beşê ya navçeya Kayapinarê bi keresteyên xemilî û bi tevahî malzemeyên xwezayî bê çêkirin.

'Armanca me ew e ku tovên herêmî kom bikin û parve bikin'

Koordînatorê Dibistana Avhewayê ya Agroekolojiyê Bişar Îçli der barê pirtûkxaneyê de agahî da û diyar kir ku di vê pirtûkxaneya ku dê ji axê bê çêkirin de tovên herêmî bên berhevkirin, pirkirin û parvekirin. Îçli, diyar kir ku pirtûkxane dê di meha Adarê de bê vekirin û got, “Armanca me ew e ku tovên herêmê ji gundan kom bikin. Em bi taybetî armanc dikin ku tovên herêmî yên taybet ên Mezopotamyayê berhev bikin û parve bikin."

'Armanca me ew e ku em xwe bigihînin xwarinên tendurist'

Îçli, anî ziman ku tovên herêmî gav bi gav ber bi tunebûnê ve diçin û tovên heyî bi giranî ji aliyê şîrketan ve tên desteserkirin û destnîşan kir ku armanca wan bi vê însiyatîfê ew e ku xwe bigihînin xwarinên saxlem. Îçli diyar kir ku ew ê bi cotkarên ku li gundan tovên herêmî diçînin an jî zêde dikin re hevkariyê bikin û van tovan ji nû ve bicivînin û wiha got: “Armanca me ya sereke ew e ku em bigihêjin xwarina saxlem. Di warê çandiniyê de, em armanc dikin ku bi rêbazên xwezayî û kevneşopî, bêyî karanîna kîmyewî hilberînê bikin. Em ê vê pêvajoyê bi pergala xwe ya çandiniya çandî bi rê ve bibin."

'Dê tov bibe xwedî nasname'

Îçli di berdewamiya axaftina xwe de bal kişand ser girîngiya temînkirina taybetiyên herêmî û verastkirinên erdnîgarî yên tovan û wiha got: “Her tov li her derê şîn nabe. Faktorên wekî avhewa, ax û şert û mercên hewayê rasterast bandorê li geşbûna tovê dikin. Di vê pirtûkxaneyê de, em armanc dikin ku cûreyên tovan arşîv bikin û nasname û agahdariya dîrokî ya wan biafirînin. Agahiyên wekî kîjan tov ji ku, kengê û ji aliyê kê ve hatiye hilberandin ji bo me pir girîng e. Tov wê bibe xwedî nasname û ev jî wê bibe bîreke dîrokî. Em girîngiyê didin van agahiyan bi civakê re parve bikin."

'Em ji gelê xwe hêvî dikin'

Îçli bang li welatî, cotkar û saziyên xwedî tovên herêmî kir û wiha dawî li axaftina xwe anî: “Em ji gelê xwe hêvî dikin ku piştgiriyê bidin vê hevgirtinê. Bi taybetî hêja ye ku hevalên me yên cotkar tovên xwe yên herêmî bi me re parve bikin. Her wiha armanca me ew e ku bi komeleyên ekolojiyê û saziyên din ên têkildar re hevkariyê bikin. Her wiha eger tov bi kargoyê bên şandin em ê lêçûnên xwe bidin ber xwe.”

Navnîşanên têkiliyê

Kesên ku dixwazin piştgiriyê bidin Pirtûkxaneya Tovî dikarin bi telefona 0412 229 48 80 – 4701 an jî bi rêya e-mail ji bilgidesifiratik@gmail.com re têkilî daynin.

Her wiha welatî dikarin serî li Midûriyeta Guhertina Avhewa û Sifir Bermayiyên li navçeya Kayapinarê (Bulvara Diclekent, Talaytepe Mahallesi 4007/2 Sokak No:4, Li kêleka Santrala Parzinandinê ya DÎSKÎ) bidin.