Midûriyeta Giştî ya DÎSKÎyê ya bi ser Şaredariya Bajarê Mezin ê Amedê, ji bo pirsgirêka ava vexwarinê li 25 taxên gundewarî yên navçeyên navendî çareser bike, wê 25 bîrên sondajê vede.

Midûriyeta Giştî ya Rêveberiya Av û Kanalîzasyonê ya Amedê (DÎSKÎ), bi nêzîkatiyeke hesas li hemberî zehmetiyên wekî krîza avhewayê ya gerdûnî, kêmbûna debiya çavkaniyên avê û zêdebûna nifûsê, li seranserê bajêr projeyên nû pêk tîne. Di vê çarçoveyê de, bi armanca xurtkirina dabînkirina ava vexwarinê bi taybetî li taxên gundewarî, di sala 2025an de tê plankirin ku bi armanca bikaranîna çavkaniyên ava binerdî bi awayekî berhemdartir li navçeyên navendî û taxên girêdayî wan, 25 bîrên sondajê yên nû ji bo ava vexwarinê bên vekirin.

Piştî ku pêvajoya îhaleyê di Sibata 2025an de bi dawî bibe, dê derbasî qonaxa peymanê ya projeyê were kirin, ku tê pêşbînîkirin ku ji aliyê şîrketa peymankar ve di nav 120 rojan de were temamkirin.

'Ava vexwarinê ya bê navber dê were dabînkirin'

Midûrê Şaxa Rêveberiya Projeya Plana Etûdê ya DÎSKÎyê Recep Karabulut diyar kir ku bi entegrekirina ava ku ji sondajan were bidestxistin bi binesaziya heyî re, dê kêmasiyên di dabînkirina avê de werin çareserkirin û dê were misogerkirin ku welatiyên li taxên gundewarî dijîn bigihîjin ava vexwarinê ya bê navber û saxlem. Karabulut diyar kir ku piştî xebatên sondajê bi dawî bibin, piştî analîzên avê yên ku dê bên kirin, dê çavkaniyên avê yên ku hatine tespîtkirin ku ji bo vexwarina mirovan guncav in, bi şebekeyên taxan ve bên girêdan.

Karabulut diyar kir ku proje ne tenê armanc dike ku çareseriyê ji kêşeyên avê yên demkurt re bîne, lê di heman demê de armanc dike ku di demeke dirêj de tevkariyê li rêveberiya domdar a çavkaniyên avê bike û diyar kir ku ew ê bi taybetî li hemberî zêdebûna xerckirina avê ya di mehên havînê de ewlehiyeke zêde biafirîne.