Seke yeno zanayene, mewzuatê ke têkildarê wezîfe û selahîyetanê Şaredarîyanê Şaristanê Girdî yo, çarçewaya reformanê îdareyê herêmkî de serra 2004î ra nat newe ra ame serûberkerdene û cayê xo verda Qanûnê Şaredarîya Şaristanê Girdî yê hûmara 5216î ke tarîxê 10.07.2004î de ame qebûlkerdene û tarîxê 12.11.2012î de ame aktuelkerdene. Pê nê serûberkerdişê neweyî, warê falîyetê Şaredarîyanê Şaristanê Girdî hîra bî, selahîyet û wezîfeyê ci zêde bîyî, awanîya organîzasyonî û têkilîyanê xizmetî de newekerdişê muhîmî ameyî bicaardene.

Wezîfe, selahîyet û berpirsîyarîyê şaredarîya şaristanê girdî nê yê:

1. Bi girewtişê fikranê şaredarîyanê qezayan, hazirkerdişê plananê stratejîkan ê şaredarîya şaristanê girdî, hedefê ci yê serraneyan, bernameyê sermîyangozerî û goreyê nînan zî butçeya ci.

2. Bi şertê ke goreyê planê întîzamê cugehî bo, sînoranê şaredarîya şaristanê girdî de her peymî de mabênê 1/5.000 û 1/25.000î planê îmarî yê nazimî kerdene, dayene kerdene û pê tesdîqkerdişî bicaardene; planê tatbîqê îmarî ke şaredarîyê mîyanê şaristanê girdî goreyê planê nazimî do hazir bikerê, vurînayîşê ke do nê planan de bêrê kerdene, planê parselasyonî û planê îslahê îmarî eynî yan bi vurnayîş tesdîqkerdene û çimdarîya bicaardişê ci kerdene; şaredarîyanê qezayan rê ke ê tarîxî ra dima ke planê îmarî yo nazim kewt meriyet, heta serrêk planê tatbîqê îmarî û planê parselasyonî nêvirazenê, planê tatbîqê îmarî û planê parselasyonî kerdene yan dayene kerdene.

3. Bi qanûnan projeyê ke wezîfe û xizmetê ke dayîyayê şaredarîya şaristanê girdî hewceyê ci kenê, planê îmarî yê her peymê têkildarî yê karê viraştiş, miqate û tamîrî, planê parselasyonî û her tewir tatbîqê îmarî kerdene û ruhsat dayene, selahîyetanê ke Qanûnê Gecekonduyî yo bi tarîxê 20.7.1966î û hûmara 775î de dayîyayê şaredarîyan, bikarardene.

4. Cayanê karî rê ke waranê ke hetê şaredarîya şaristanê girdî ra yenê viraştene yan ramitene, û ê cayan de ke do waran binê berpirsîyarîya şaredarîya şaristanê girdî bêrê ramitene, ruhsat dayene û çimdarî kerdene.

5. Selahîyetanê ke madeyanê 69. û 73. yê Qanûnê Şaredarîye de yê, bikarardene.

6. Planê serraneyî yê resî yê şaristanê girdî kerdene yan dayene kerdene û bicaardene; xizmetanê res û komresî plankerdene û koordînasyonê ci temînkerdene; hûmara her tewir servîs û wesayîtanê komresî û taksîyanê ke welat, behr, awe û asinrayîrî ser o yenê ramitene, heqê bîletan û tarîfeyanê ci, wext û rayîranê ci dîyarkerdene; cayê dingan û wesayîtan ser o rayîranê parkkerdişî yê wesayîtan ke rayîr, cade, kuçe, meydan û cayanê pêroyîyan ser o yê, tesbîtkerdene û ramitene, dayene ramitene yan kîra dayene; heme karanê ke serûberkerdişê trafîkî ke qanûnan dayê şaredarîyan, hewceyê ci kerdene.

7. Rayîrê ke waranê binê selahîyetê şaredarîya şaristanê girdî de taxan girê danê, merkezê qeza, meydan, bulwar, cade û rayîranê serekeyan kerdene, dayene kerdene, miqate û tamîrê ci û pakkerdişê nê rayîran û xebatanê têkoşînê vera vewre ramitene; goreyê projeyanê dîzaynê bajarî seba awanîyanê ke nê cayan de rîyê xo est o, berpirsîyarî ronayene; cayanê ke do îlan û reklam tede bêrê dardekerdene û şekl û peymê nînan dîyarkerdene; nameydayîş û hûmardayîşê meydan, bulwar, cade, rayîr û kuçeyan û hûmardayîşê awanîyanê ke nînan ser o yê, bicaardene.

8. Awankerdişê sîstemanê agahî yê coxrafî û bajarî.

9. Goreyê bingeyê averşîyayîşê domdarî temînkerdişê pawitişê cugeh, waranê citekarî û hewzanê awe; ronayîşê daran kerdene; cayanê karî yê nêweşî, cayanê şayîye, cayanê karî yê bînî ke weşîya şarî û cugehî rê tesîrê ci est o, cayanê muayenê bajarî de pêserardene; waranê depokerdiş û rotişê malzemeyanê viraştişî, hafrîyat, herre, qûm û eşteyî, cayanê rotiş û depokerdişê kolî û komirî dîyarkerdene, kiriştişê nînan de tedbîranê ke cugehî lêmin nêkenê girewtene; planê îdareyê eşteyê huşkî yê şaristanê girdî kerdene, dayene kerdene; arêkerdişê eşteyê huşkî yê çimeyî û kiriştişê ci yê heta îstasyonê neqlkerdişê teberî, xizmetanê ci yê têkildarî û peyserkerdiş, depokerdiş û bertarafkerdişê eşteyanê huşkan û hafrîyatî ramitene, seba naye tesîsan awankerdene, dayene awankerdene, ramitene yan dayene ramitene; xizmetanê têkildarî yê eşteyanê sanayî û tibî ramitene, seba naye tesîsanê laziman awankerdene, dayene awankerdene, ramitene yan dayene ramitene; eşteyê wesayîtanê behrî arêkerdene, dayene arêkerdene, awguznayene û derheqê naye de serûberkerdişanê laziman kerdene.

10. Cayanê karî gayrîsihhîyan rê ke sinifa yewine de yê têkildarê xidayan ê, ruhsat dayene û çimdarî kerdene, seba tehlîlkerdişê madeyanê werd û şimitişî laboratuwaran awankerdene û ramitene.

11. Waranê ke şaredarîya şaristanê girdî tede selahîyetdar o yan rameno, tede xizmetanê zabita ramitene.

12. Terminalê raywan û barî, otoparkanê girewteyan û akerde kerdene, dayene kerdene, ramitene, dayene ramitene yan ruhsat dayene.

13. Awanîyê komelkî yê ke pêroyîya şaristanê girdî rê xizmet kenê, parkanê herêmkî, baxçeyê heywanan, baxçeyê heywanan, kitabxane, muzexane, warê sporî, aramîye, şayîye ûsn. kerdene, dayene kerdene, ramitene yan dayene ramitene; eke hewce bo klûbanê sporî yê amatoran rê ardimê nakdî kerdene, malzeme dayene û destekanê laziman temînkerdene, mîyanê taximanê amatoran de musabeqayanê sporî organîzekerdene, sporkar, îdarekarê teknîkî, antrenor û wendekaran rê ke welat de û teberê welatî de ser kewenê, derece gênê, bi qerarê meclisê şaredarîye xelate dayene.

14. Eke hewce bo seba camî û xizmetanê weşî, perwerde û kulturî awanî û tesîsan akerdene, miqate û tamîrê her tewir ê awanî û tesîsanê nê xizmetan û yê dezgeh û sazgehanê pêroyîyan kerdene û destekê malzemeyî yo lazimî temîn kerdene.

15. Temînkerdişê pawitişê kultur û xozayî, asayîşê tarîxî û cayanê ke hetê tarîxê bajarî ra muhîm ê û fonksîyonanê ci, seba naye miqate û tamîrê ci kerdene, êyê ke pawitişê ci mumkun nîyo goreyê eslê ci newe ra viraştene.

16. Xizmetanê komresî yê mîyanê şaristanê girdî ramitene û seba naye tesîsanê laziman awan kerdene, dayene awankerdene, ramitene yan dayene ramitene, wesayîtanê komresî yê ke sînoranê şaristanê girdî de welat û behr ser o yê, taksî û wesayîtê servîsî zî tede, ruhsat dayene.

17. Xizmetanê awe û kanalîzasyonî ramitene, seba naye baraj û tesîsanê bînan ê laziman awankerdene, dayene awankerdene û ramitene; îslahê royan kerdene; awa çimeyî yan awa ke netîceya awguznayîşî de peyda bena, bazarîkerdene.

18. Waranê goristanan tesbîtkerdene, goristanan awankerdene, ramitene, dayene ramitene, xizmetanê têkildarê defnî ramitene.

19. Her tewir halê toptankaran û mezbahan viraştene, dayene viraştene, ramitene yan dayene ramitene, hal û mezbahanê taybetîyan ke do cayanê ke planê îmarî de yenê mojnayene, tede bêrê kerdene ruhsat dayene û çimdarî kerdene.

20. Goreyê planê ke daraxê bajarî de yenê kerdene, plankerdiş û amadekarîyanê bînan ê têkildarê afatanê xozayî, şaristanê girdî de kerdene; eke hewce bo herêmanê afatan ê bînan rê destekê wesayît, hacet û malzemeyî dayene; xizmetanê îtfaîya û ardimê lezabezî ramitene; waranê berhemardiş û depokerdişê madeyanê teqayox û adirgiran tesbîtkerdene, keye, cayê karî, cayê şayîye, fabrîka û sazgehanê sanayî û sazgehanê pêroyî hetê tedbîran ra ke do vera şewat û afatanê bînan bêrê girewtene, çimdarî kerdene, nê warî de destûr û ruhsatan dayene.

21. Xizmetanê her tewir sosyal û kulturî yê ke seba merkezanê weşîye, nêweşxaneyan, unîteyanê weşîye yê gêrayoxan û pîlan, pîran, astengdaran, cinîyan, ciwanan û gedeyan ramitene, aver berdene û seba naye tesîsanê sosyalan awan kerdene, kursanê qezenckerdişê meslek û qabîlîyetan akerdene, ramitene yan dayene ramitene, demê ramitişê nê xizmetan de unîversîte, dibistananê berzan, lîseyanê meslekî, sazgehanê pêroyî û rêxistinanê komelê sîvîlî reyde hemkarî kerdene.

22. Sîstemanê germkerdişê merkezî awankerdene, dayene awankerdene, ramitene yan dayene ramitene.

23. Awanîyanê ke talûkeyê afate est ê yan hetê emnîyetê gan û malî ra talûke virazenê, tehlîyekerdene û derheqê rijnayîşî de eke şaredarîyê qezayan biwazê her tewir destek temîn kerdene.