Rennes – Fransa

Rennes – Fransa

Rennes ke paytextê Herêma Bretagne (Bretonya) ya vakur rojawanê Fransa yo, pê nifusê xo yo teqrîben 230 hezarî merkezanê muhîman ê kultur, perwerde û înovasyonî yê welatî ra yew o. Rennes ke pê fehmê xo yo bihêz ê îdareyê herêmkî, polîtîkayanê cugeh û îklîmî û tatbîqanê bajarwanîya domdare vernî de yo; eynî wext pê xebatanê xo yê warê piştîpêdayîşê mîyanneteweyî û dîplomasîya herêmkî mîyanê şaredarîyanê Ewropa de nimune yo.

Têkilîya mabênê Amed û Rennesî, protokolê fermî yê bajarê wayûbirayî ra zaf verêr o, teqrîben reseno çewres serrî verê. Bingeyê piştîpêdayîşê mabênê her di bajaran, pê têkilîyanê dostîye ke ê dewrî de mabênê Şaredarîya Amedî û Şaredarîya Rennesî de ameyî ronayene û pê otobusêka şaredarîye ke hetê Şaredarîya Rennesî ra Amedî rê ame hîbekerdene, ame eştene. No piştîpêdayîşo bi mana, mîyanê demî de tena mabênê her di şaredarîyan de ney, mabênê şarê her di bajaran de zî bî wesîleyê awankerdişê girêdayîşanê hêzdaran.

Teqrîben çewres serran dest û dilayan de zîyaretê dihetan, çalakîyê kulturî û hemkarîyê komelê sîvîlî na têkilî ganî tepîşte. Têkilîya mabênê Amed û Rennesî, tena berhemê hemkarîyêka dezgehkî nîya ke mabênê şaredarîyan de ameya ronayene. Têkilîya kulturî û komelkî ya ke komelê kurdan ê Rennesî de ciwîyena, sazgehanê komelê sîvîlî û aktoranê herêmkî yê her di bajaran aver berde, kiriştoxanê tewr muhîman ê na dostîye ra yew bî. Protokolê fermî yê bajarê wayûbirayî yê mabênê şaredarîyan zî, nê zemînê bawerî û piştîpêdayîşî ser o ke mîyanê serran de mabênê şaran de ame awankerdene, ame ronayene.

No vîyarteyo kokdar, serra 2025î de pê Protokolê Bajarê Wayûbirayî ke mabênê Şaredarîya Amedî ya Şaristanê Girdî û Şaredarîya Rennesî ame îmzakerdene, resa qonaxêko newe. Bi no hewa dostîya ke bi serranê dergan ronîyaya, bedilîya bîye hemparîyêka dezgehkî; seba averberdişê projeyanê hemparan ê waranê sey polîtîkaya cugeh û îklîmî, bajarwanîya domdare, kultur û huner, xebatê ciwanan, piştîpêdayîşê komelkî, polîtîkayê sosyalî û hemkarîya mîyanneteweyî zemînêko bihêz ame awankerdene.

Ewro têkilîya bajarê wayûbirayî ke Rennesî reyde ameye ronayene, tena hemparîyêka fermî ya mabênê her di şaredarîyan nîya; encamê dostî, bawerî, dezgehkî û piştîpêdayîşê nê her di şaran o ke çewres serran ra yo dewam keno.

Yatta – Filistin

Yatta ke sînoranê Walîtîya El Halîl (Hebron) ya başûrê Fîlîstînî de yo, bajarêko muhîm ê Fîlîstînî yo ke pê mîrasê xo yo tarîxî yo dewlemend, awanîya xo ya komelkî ya bihêze û fehmê xo yê îdareyê herêmkî vernî de yo. Şaredarîya Yatta ke şertê sosyoekonomîkî yê herême est ê zî bi qerardarî xebatanê xo yê domnayîşê xizmetanê herêmkî, xurtkerdişê piştîdayîşê komelkî û piştîdayîşê averşîyayîşê domdarî ser o dewam kena, hemkarîyanê mabênê şaredarîyanê mîyanneteweyî rê zî muhîmîye dana.

Têkilîya bajarê wayûbirayî ya mabênê Şaredarîya Amedî ya Şaristanê Girdî û Şaredarîya Yattaya Fîlîstînî, bingeyê piştîdayîş, aştî û destekê dihetî yê mabênê şaran ser o ameye ronayene.

Na hempartî, bi taybetî amanc kena ke parekerdişê tecrubeyî mabênê îdareyanê herêmkî de ke binê şertanê zehmetan de cuya xo dewam kenê, xurt bikero, girêdayîşanê kulturî aver bero û piştîdayîşê mîyanneteweyî biresno zemînêko dezgehkî.

Bi protokolê bajarê wayûbirayî reyde her di şaredarîyan derheqê parekerdişê tecrubeyanê îdareyê herêmkî, averberdişê projeyanê kulturî û sosyalan, xebatanê cinî û ciwanan, xizmetanê bajarî yê domdaran û zêdekerdişê hemkarîyanê mîyanneteweyî de îradeyo pîyaxebitîyayîşî eşkera kerd.

Na wayûbirarîya mabênê Amed û Yatta, tena têkilîyêka fermî nîya ke mabênê şaredarîyan de ame ronayene; sembolêko hemkarîyêka bihêz o ke bingeyê erjanê hemparan ser o, piştîdayîş û dostîya mabênê şaran resneno ameyoxî.