Borsaya qayyûmî karê xo ser o ya: Yenî Şafak demokrasî rê operasyon keno

Çapemenîyê îqtîdarî Yenî Şafak ewro bi zur û îftîrayê “Kandîl Qeyyûm Eşto Dîyarbekirî ser o” derbe dano îtîbarê Şaredarîya Amedî ya Şaristanê Girdî ro û rayberê şaredarî ke 31ê Adare de bi reyanê şarî ameyî karê xo ser, înan rê operasyon keno. Verê zî, no parçeyê kaxizî ke xo ra vano rojname, etîkîya çepemenî, heqê însanan û karneya masûmîyetî bipay kerdbî û nê tewir xeberî eştbî orte. Ewro zî bi eynî ê metodî cehd keno ke raya pêroyî bêro xapênayîş ke seba destsernayîşê îradeyê şarî rayîr akero. Ma zanê no metod yê rejîmanê antîdemokratîk û dîktayan o. No rojname û o keso ke na xebere viraşta, wa bizanê ke xo kenê tetîkçî. Bi nê vatiş û îftîrayanê zur û bêserûbinan bi hewayêko bêehlaq û bêetîk cehd kenê ke rayberîya ma bikê hedef. Bi fikrê “Çamur bierze wa leymê ci bimano” çapemenî de cehd kenê leyminîye virazê û qeyyûmî rê rayîr akê. Ma wazenê înan ra vajê ke; No şar di rey şima dekerd binê erdî coka ma do reyna nêverdê ke şima şaredarîyanê ma talan bikê. O rojnameyo qestikên, ma zanê seba ke rayîrê rantê ey birîyayo nika bi dejê ey nê çîyan keno. Ma reyna vanê: Bi zordarîya polîsan, bêdemokrasî û rayîranê bînan ê antîdemokratîkan merê beranê şaredarîyan ver ke bi îradeyê şarî ameyî girewtene.

Raya pêroyî ganî bizana ke o kes o ke xebere de nameyê ey vîyareno, tewr kêmî 10-15 serrî yo ke memurîya şaredarî keno. nê însanî wextê qeyyûmî de zî karê xo ser o bîy. Ê demî de seba nê însanan problemêk çin bî, nika wezîfeyêk girewt û bîyî problem?

Şaredarîya ma serê sibayî bi rayberîya xo gerreyê ê parçeyê kaxizî û o rojmanegerê qestikênî kena. Sewbîna ê kesê ke rojname de beshê înan beno, ê zî do gerreyê înan bikê.

Ê kesê ke seba qeyyûmî rayîr akenê, ma şima vanê! Çîyo ke şima sandiqan de nêeşkîyayî bikê, şima do bi zordarîye zî nêeşkîyê bikê. Ma do şima û zuranê şima vera sere nêronê.

Raya pêroyî rê bi hurmet.

Şaredarîya Amedî ya Şaristanê Girdî