Hemşaredarê Bajarê Girdî yê Amedî Serra Bucak û Dogan Hatun beşdarê sersaxî yê welatijê ke şewat de dinyaya xo bedelnabî, bîyî.

Hemşaredarê Bajarê Girdî yê Amedî Serra Bucak û Dogan Hatun, hemserekê DEMî Tûlay Hatîmogullari û Tuncer Bakirhan, hemserekê DBPî, parlementerê DEMî, Hemşaredarê Bajarê Girdî yê Wan û Mêrdînî û hemserekê şaredarîyanê qezayan, keyeyê kesê ke şewatê mabêne qezayanê Çinar û Şemrexê Mêrdînî de vejîyabî û dinyaya xo bedelnabî, zîyaret kerdî.

Destpêk de hemserekî şîyî serdayîşê taxa Yucebagî ya qezaya Şemrexî ya Mêrdînî, keyeyî ameyî têhet û sersaxî waştî.

Dima ra zî hemserekî derbazê taxê Koksalan û Ayçîçekî yê Çinarî bîyî û tîya keyeyan reyde pêvînayîş kerdî û sersaxî waştî.

DBB welatijan tena nêverdeno

Heto bîn ra Şaredarîya Bajarê Girdî ya Amedî paştdayîşê welatijê ke şewat de zirar dîyê, dewam kena.

Ekîbê girêdayeyê Serekîya Daîreyê Xizmetê Paştdayîşî awa fêkiyan û awe îkramê welatijê ke Fakulteya Tibî yê Unîversîteya Dîcleyî, Nêweşxaneyê Cigêrayîşî yê Gazî Yaşargîlî û Sazgehê Tibê Edlî de pabeyê merdimanê xo yê kerd. Sewbîna Nêweşxaneya Cigêrayîşî de zî merdimanê nêweşan rê werd ame vilakerdiş.

Paştdayîşê ambulanse ame dayîş

Ambulansî hetê Serekîya Mudurîyê Weşîye ra Sazgehê Tibê Edlî rê ameyî tehsîskerdiş û semedê merdimê nêweşan zî bi di mînîbusan xizmetê resnayîşî yeno dayîş.

Paştdayîşê malzemeyî ame kerdiş

Serekîya Daîreyê Xizmetê Paştdayîşî goreyê waştiş û lazimîyê taxê ke seba felaketî tesîr bîyê, destekê malzemeyî kerd.

Na çerçawa de 100 kursî, 30 sehpa, 2 klîma û dolaba cemidnayîşî teslîmê taxa Koksalanî ame kerdiş. Taxa Yazçîçekî rê zî 210 kursî, 8 çadirî, 3 perwane, werd û malzemeyê pakitî ameyî şirawitiş.