Şaredarîya Amedî ya Şaristanê Girdî seba ke şewato ke mabênê qezayanê Çinar û Şemrexî de vejîyaybî, uca de cigêrayîş biko komîsyonêk awan kerdbî. Komîsyon etüde 3 rojan ra dima raporê xo eşkera kerd. Goreyê raporî şewat rîyê têlanê ceyranî ra vejîya.

Serekîya Daîreya Îtfaîye seba ke şewatê mabênê Çinar û Şemrexî de cigêrayîş bika, bi beşdarîya Mudirê Şubeya Îtfaîyeyî Selehattîn Zenger, Amîrê Perwerdeyê Îtfaîye Îhsan Gezer û amîranê îtfaîye ra Seyfettîn Salci û Hasan Ugurlu, Serekîya Daîreya Weşîye ra Baytar Hekîm Hasan Korkmaz û Serekîya Daîreya Park û Baxçeyan ra Muhendisê Zîreetî Îlhan Başol Komîsyon 3 rojî herême de etudî kerdî.

28 wasita û 108 personelan mudaxele kerd

Goreyê Raporî 20.06.2024 roja panşemeyî de saete şewe 10.09 (tr.22.09) de xebere ameye îtfaîye. Deqayêke ra dima saete 10.10 de wasitaya yewine îstasyonî ra vejîyaye. Û 15 deqayan ra dima saete 10.25î de resaye cayê şewatî û mudaxele kerd. Grûbanê îtfaîye yê Yenîşehîr, Kayapinar û Baglarî ra û Serekîya Daîreyanê Park û Baxçeyan û Kontrol û Pawitişê Derûdorî ra 28 wasitayî û 280 ton awe ameye erşawitene.

Dîrega ceyranî ra çilka adirî kewt vaş û pûşî ser o

Komîsyon tespîtê xisarî mehlaya Koksalan de etudanê xo qedêna û dima têvet ke şewat rîyê têlanê ceyranî ra vejîyayo. Komîsyon do nê raporê xo Dozgerîya Cumhurîyetî reyde zî pare biko.

924 heywanê pesî merdî

Mehlaya Koksalan de 302 bizî, 622 mêşnayî merdî û 1627 hektar cayo ramite (xele,merci ûsn), 10 dekar şitilê fistiqan, 2 motorî, 19 tesîsê awedayîşî, 4 trafoyê ceyranî, 2 mizberî, 35 panelê tîje, makînayêka çapayî, 1 pulverîzator, 2 tanqê gibreyî, 10 henarêrî, 1 vilakerdoxa gubreyî, 140 ton simer zirar dî. Mehlaya bagacik de zî ‘ tesîsê awedayîşî û 15 dekar şitilê vamêran, Mehlaya Yazçiçegî de zî 42 taximê awedayîşî veşayî.

Amed de 5 kesan dinyaya xo bedilna

Şewwato ke qezaya Çinar de mehlayanê Koksalan, Yazçîçegî û Bagacik de vejîya, ê şewatî de 5 kesan dinyaya xo bedilna û 22 kesî zî birîndar bîyî. Birîndaran ra 1 kes erê îtfaîye yo.