Kombîyayîşê grûba fokusî ke bi babeta “Bajarwanîye” ame kerdene, Hemşaredara ma Serra Bucak qisey kerd û ard ziwan ke ê wazenê planê îmarî yo yewpare awan bikê. Û ê do seba resayîşê komkî ke hewcedarîya amedî bi ey est a, dest bi Planê Resayîşê yê Mastirî kerdo.
Kombîyayîşê Şaredarîya Amedî ya Şaristanê Girdî yê Planê Stratejîk yê 5 serran ÇandAmed de dewam kenê. Bi temsîlkaranê rêxistinanê sivîlan, odayê meslegan û kadroyê şaredarî bi babeta “Bajarwanîye” kombîyayîşê Grûba Fokusî virazîya. Hemşaredara ma Serra Bucak, Hetkarê Sekreterîya Pêroyî Reşat Bakan, TMMOB, Heyetê Koordînasyonê Bajarî, Odaya Mîmaran, Odaya Muhendîsanê Zîreetî, Odaya Muhendîsanê Makîna, Odaya Muhendîsanê Jeolojî, Odaya Muhendîsanê Xerîta, Odaya Plankerdoxanê Şaristanî, Platformê Pawitişê Şaristanî yê Amedî, DTSO, Baroya Amedî, Odaya Mîmaranê Peyzajî, Komîsyonê Pawitişê Derûdor û Şaristanî, ÎHD, Komela Mutehîdanê Înşaatî, Komela Pawitişê Tebîat û Kulturî, Komela Ekolojî, Weqfa Daşinasnayîşê Kulturê Amedî, (DÎTAV) Federasyonê Endamê Bêastengdaran, Komela Cigêrayîşê Koçkerdişî ya Goçî, Weqfa Goçî ya Hetkarîya Însanîye, Grûba Cinîyan a Bîsîklete, Komela Yenî Yaşam û Temsîlkarê Tîgrîs Bîsîkletî beşdarê kombîyayîşî bîy.
Hemşaredare Bucak: 8 serran awanbîyayîşo qaçax zaf zêde bî
Hemşaredare Bucak akerdişê kombîyayaşî de qisey kerd û va ke nê kombîyayîşî zaf muhîm ê. Bucak dîyar kerd ke derheqê îmarî de şaristanî de çend çîyî ganî bêrê zanayene. Bucak wina dewam kerd: “Helbet problemê ma yê îdareyê herêmkî bî nê awanbîyayîşê qaçaxî, nê warî de xo rexne kenê ganî ma xorexenekerdişî ra dest pêbikê. Hem şaredarîyê merkezî hem zî yê qezayan na babete de ganî ser o vinderê. 8 serranê qeyyûman de no awanbîyayîşo qaçax resa cayêko zaf berz.”
Bucak behsê binawanî, awe û resayîşî zî kerd û wina va: “Roşanî ra heta ewro ma şarî reyde kewenê têkilî de nê waran de problemanê înan goşdarî bikê û bibê çare. Hem ekîbê ma hem zî yê DÎSKÎ bêmabên xebitênê.”
‘Ma do pêşnîyazan dekerê Planê Stratejîkî’
Bucak da zanayene ke ca de mudaxeleyî tena a game bena çare û dîyar kerd ke ê wazenê planêkê îmarî yo pêroyî awan bikê û pêşnîyazê ke nê kombîyayîşî de yenê kerdene do bêrê erjnayene.
‘Ma seba çareyî gaman erzenê’
Bucak dîyar kerd ke problemê resayîşî, îmarbîyayîşê bênîzamî û awanbîyayîşo qaçax sey yewbînan ê. Bucak wina dewam kerd: “Şaristanî de destûr ameyo dayene ke bi hewayêko bênîzam û bêkontrol awanbîyayîş vila bibo. Qet nêameyo aqilê qeyyûmî ke planêkê mastirî yê resayîşî awan biko ke vernîya nînan bigîro. Wexto ke ma îdareyî dewir girewt ma dî ke fîloyê otobusanê ma nêmeyî ra zafêr nêxebitênê. Temîr û nîyadayîşê înan nêameyo kerdene. Û ma dî ke heme temîrkerdişî tena seba fîrmayêk ameyî kerdene ke a fîrma gird bikê. Ma cehd kenê ke atoleyeyanê xo awan bikê ke temîrkerdişî bikerê xoser.
‘Hewcedarîya şaristanî bi resayîşê rayîrasinênî est a’
“Wexto ke ma ameyî kerî ser, ma bi şoforanê otobusan ameyî têhet û cehd kerd ke pîya çareyêk peyda bikê. Bi nê kombîyayîşanê planê stratejîk yê 5 serran ma do dewam bikê ke şarê xo rê bibê çare. Hewcedarîya şaristanî bi resayîşê rayîrasinênî est a. Ma seba ney xebitîyenê. Şaristanêko bi 2 mîlyonan yeno meydan hewcedarîya ey bi ney est a.
Estetîkê şaristanî yo 4 hezar serrî ganî tim çiman ver de bibo
Temsîlkarê rêxistinanê sivîlan ke beşdarê kombîyayîş bîy, pêşnîyazê xo yew bi yew vatî, tayê înan wina yê: Awanîyê ke Sûr de yê ganî bêrê restorekerdene. Îmarkerdişê neweyî de ganî estetîkê şaristanî yo 4 serran tim çiman ver de bibo. Ganî hîna zaf muhîmîye “ca de bedilnayîş” rê bêra dayene. Seba astengdaran rayîr û dingî newe ra bêrê viraştene. Nebat û heywanê herêmê ganî bêrê pawitene. Nebatê herême ganî peyzajî de bêrê xebitnayene. Rayîrê bîsîklet û rayîrşîyayîşî ganî bêrê vêşîkerdene. Seba gedeyan ganî cayî bêrê viraştene. Cayanê newîyan de seba peyayan hîna zaf çîyî bêrê fikinayene.