Hemşaredarê Şaristanê Girdî yê Amedî Serra Bucak û Dogan Hatunî va ke kes bê qeydê Passolîgî nêeşkeno maçan stadyuman de temaşe bikero û terefgirê Amedsporî dawet kerdî ke karta Passolîgî bigîrê.

Hemşaredarê Şaristanê Girdî Serra Bucak û Dogan Hatun, seba ke terefgirê Amedsporî qeydê Passolîgî bikerê, vera Amedstore yê Ceylan Karavil AVM de beyanat da.

Bucak: Bê karta Passolîgî maç stadyum de nêyeno temaşekerdene

Hemşaredare Bucak va ke Amedspor sezonê futbolî yê 2024-2025 de Lîga 1. de do kay bikero û venga terefdanê Amedsporî ke "Terefgirê ke Amedsporî ra hes kenê, seba temaşekerdişê maçan do hewceyîya înan bi karta Passolîgî biba. Bê karta Passolîgî terefgirêkê Amedsporî zî nêeşkeno stadyum de maçan temaşe bikero. Seba ney, ma ewro heme terefgiranê Amedsporî û embazê ke na tîme ra hes kenê, dawet kenê ke karta Passolîgî bigîrê. Ma ewro karta xo ya Passolîgî girewte û ma do sezon de bi saya nê karte bieşkîyê heme maçanê Amedsporî temaşe bikerê. Eke na karta nêbo, ma nêeşkenê temaşe bikerê. Coka; ganî şima zî karta xo ya Passolîgî bigîrê û piştî bidê Amedsporî. Bi kartanê Passolîgî ke şima do bigîrê, ma eşkenê pîya hêz û destekê Amedsporî bimojnê. Ma seba şima pêroyînan sezonêko weş wazenê."

Hemşaredar Hatun: Seba piştîdayîşê Amedsporî ma Passolîg bigîrê

Hemşaredar Hatunî zî va ke; Amedsporî emser sezonêko weş vîyarna û vejîya Lîga 1. û wina dewam kerd: "Şima ganî bieşkîyê bêrê maçanê Amedsporî yê Lîga 1. Seba ney ganî şima karta Passolîgî bigîrê. Bê Passolîgî kes nêeşkeno bikewo stadyum û nêeşkeno maçî temaşe bikero. Seba ke ma piştî bidê Amedsporî, seba ke ma piştî bidê bajarê xo ma karta xo ya Passolîgî bigîrê. Ma ewro Amedspor Store yê Ceylan AVM zîyaret kerd. Şima eşkenê tîya ra bigîrê yan zî şima eşkenê keyepelê înternetî yê Passolîgî ra peyda bikerê. Ma veng danê heme terefgiranê Amedsporî yê her cayê dinya: Passolîgî bigîrê. Bêrê ma piştî bidê Amedsporî û ma pîya emser vejîyê Lîga Superî. Ma pîya heme maçan temaşe bikerê. Ma pîya piştî bidê Amedsporî, ma pîya Amedsporî ra hes bikerê."

Hemşaredaran karta xo ya Passolîgî girewte

Hemşaredaran, badê beyanatî xo qeyd kerd û karta xo ya Passolîgî girewte. Serekê Komîteyê Amedsporî yê Mişewreyê Berzî yê Burç Baysal û endamê heyetê îdareyî, formayê Amedsporî ke ser o nameyê înan nusîyayî dîyarîyê hemşaredaran kerd.