Hemşaredarê Amedî yê Şaristanê Girdî Serra Bucak û Dogan Hatun Taxa Elwendî ya Çinarî de şarî reyde ameyî têhet û waştişê înan goşdaritî û hemşaredaran ard ziwan ke do seba çareserî bixebitîyê.

Hemşaredarê Amedî yê Şaristanê Girdî Serra Bucak û Dogan Hatun zîyaretanê xo yê qezayan dewam kenê. Hemşaredaran taxa Elwendî (Ortaşar) ya Çinarî de şarî reyde ameyî têhet. Hemşaredarê Çinarî Semra Akyuz û Mehmet Şerîf Akyuzî û endamê meclîsî zî hemşaredaran reyde bîyî.

Hemşaredaran şar goşdarî kerd

Hemşaredarî muxtar û şarê taxe reyde ameyî têhet û hem sohbet kerd û hem zî waştiş û gazinê înan goşdarî kerdî. Hemşaredaran dîyar kerd ke 17 qezayan de zî tesîrê qeyyûman dewam keno û ard ziwan ke ê do seba çareserî bixebitîyê.

Rayîrê grûbe yê taxe de etudkerdiş

Hemşaredaran dima rayîrê grûbe yê taxa Ortayaşarî yo 5 û nêm km etud kerd ke wextê qeyyumî de ameynî îhalekerdene la asfaltê ci nêameybî rokerdene.