Şaredarîya Amedî ya Şaristanê Girdî, aşmanê Gulane, Hezîrane û Temmuze de 2 hezar 413 şewatan rê mudaxele kerd.

Serekîya Daîreya Îtfaîye, hîrê aşmanê peyênan de seba şewatanê ke têdima vejîyayî, bi kêmanîya ekîpman û personelan xebatêka muhîme kerde. Îtfaîyeya Amedî, merkezê şaristanî de Kayapinar, Yenîşehîr û Baglar de û 13 qezayanê teberî de bi 52 wasita û 310 personelan ke 149ê înan erê îtfaîye yê, xebatanê xo dewam kena.

Îtfaîye 7/24 hazir a

Aşmanê Gulane-Hezîrane-Temmuze de ke hewa germ beno û demê palîyan o, seba ke hûmarê şewatan zêde bîyo, destûrê personelê ke girêdayeyê Serekîya Daîreya Îtfaîye yê, pêro ameyî wedarnayene. Ekîbê îtfaîye ke seba mudaxeleyê şewatan xebatêka zêde kenê ke bi germîya hewayî zêde bîyê û bi wardîya saha de wezîfe gênê.

Serekê Daîreya Îtfaîye Azad Yildizî ke melumatê hîrê aşmanê peyênan eşkera kerdî, va ke bi zêdebîyayîşê germî şewatî zî zêde bîyê. Yildizî wina dewam kerd: "Bi destpêkerdişê german, yanî nêmeyê dîyin yê aşma Gulane ra tepîya şewatî dest pê kenê. Aşma Gulane de ma 41 şewatê zîyanan, 3 şewatê pûşî, 108 şewatê vaşî û 1 şewatê daristanî rê mudaxele kerd ke pêro pîya 153 şewatî bîyî."

‘Hewa ke bî germ, vakayî zî bîyî zêde’

Yildizî ke îfade kerd bi aşma Hezîrane reyde ke germ bîyo zêde, hûmarê şewatan zî zêde bîyo, YIldizî wina dewam kerd: "Aşma Hezîrane de seba ke germ hîna bîyo zêde bixozayî hûmarê şewatan zî zêde bîyo. Aşmê ke ma tewr zêde şewatan vînenê aşmê Hezîrane û Tebax ê. Aşma Hezîrane de 353 şewatê zîyanan, 627 şewatê pûşî, 290 şewatê vaşî, 12 zî şewatê daristanî vejîyayî û ma înan rê mudaxele kerd. Pêro pîya aşma Hezîrane ma 1282 şewatan peysnayî. Dima aşma Temmuze de şarî teber ra pîknîk keno coka no beno sebebê zêdebîyayîşê şewatan. Coka aşma Temmuze de 29 şewatê zîyanan, 432 şewatê pûşî, 502 şewatê vaşî û 15 şewatê daristanî rê ekîbanê ma mudaxele kerd. Pêro pîya aşma Temmuze de ma 978 şewatan rê mudaxele kerd."

'4 hezar hektar erdê ma zerar dî'

Yildizî ke dîyar kerd hîrê aşmanê peyênan de nêzdîya 4 hezar hektar erd veşayo û wina va: "Aşmanê Gulane, Hezîrane û Temmuze yê serra 2024î de 2 hezar 413 şewatan de, çi heyf ke nêzdîya 4 hezar hektar erdê ma zerar dî. Helbet xelet o ke ma naye tena sey vaş, zad û erd bifikirîyê. Ma vatbi ke candarê ke erd de ciwîyenê sey mêşna, mar, jûjo zî çiqas zerar dîyo û telef bîyê. Ma vatbi ke nê şewatî seba weşîya însanî benê sebebê gemarîya hewayî, coka veşnayîş çîyêko xelet o."

'Şûşeyê camî û qotê cixarayan meerzê teberé

Yildizî ke derheqê sebebê şewatan de qisey kerd û nê îqazî kerdî: "Wexto ke şima pîknîk kenê, bitaybetî aşmanê hamnanî de cayo ke zîyan û vaş ra dûrî yo, uca de mangal biveşnê û badê ke karê mangalî qedîya, ganî adirê mangalî bi hawayêko qetî bêro peysnayene. Ez wazena şarê ma yo ke seyahet keno, înan zî îqaz bikerî ke bitaybetî şûşeyanê camî nêerzê teber, cixarayanê xo yê nêpeysnayeyan camanan ra nêerzê teber. Zafaneyê şewatan nê tewir tevgeran ra vejîyenê."