Şaredarîya Amedî ya Şaristanê Girdî, 4 aşmanê peyênan de bajarî de 190 kîlometre rayîrî qedênayî, 225 kîlometre rayîran de zî xebatî dewam kenê.

Serekîya Daîreya Pawitiş û Koordînasyon Rayîr û Binawanîyan, seba ke res hîna emnîyetin û rehet bibo, xebatanê xo de 17 qezayanê zere û teberî de rayîrê grûbe yê taxan û girêdayîşanê înan de xebatanê binawanî, binge, stabîlîze û asfaltî kena.

225 kîlometre rayîran de xebatî dewam kenê

Ekîbî ke qezayanê teberî de rayîrê grûbe yê taxan de rayîrê neweyî virazenê û problemê resî çareser kenê, seba emnîyetê şarî xebatêka fedakarîye kenê. Ekîbanê Şaredarîya Şaristanê Girdî ke 4 aşman de 190 kîlometre rayîrî qedênayî û dekerdî xîzmet, 225 kîlometre rê zî xebatanê xo dewam kenê.

45 hezar tonî asfaltê germ ame ramitene

Ekîbî seba ke zemînê rayîran de tu xirabîye nêvejîyo, rayîranê ke do asfaltê sathî bêro ramitene, tede xebatê binawanî û bingeyî kenê, cayanê laziman de xebatê kendiş-pirrkerdişî zî kenê. Ekîban bajar de 270 hezar metrekub xebatê kendiş-pirrkerdişî, 70 hezar ton ronayîşê malzemeyê mekanîkî û 45 hezar ton rokerdişê asfaltê germî kerd. Sewbîna 145 kîlometre rayîr de asfaltê sathî ame rokerdene.

210 hezar metrekare kerrayê parke yê kilîtinî

Ekîbî xebatanê rayîran dewam kenê, kenarê rayîran zî kenê hazir. Na çarçewa de bajar de 210 hezar metrekare kerrayê parke yê kilîtinî ameyî şuxulnayene û peyerayîr û rayîrê gêrayîşî ameyî viraştene, kenarê rayîran de 11 hezar metre bazalt û bordurê betonî ameyî ronayene. Sewbîna 32 hezar metrekub dêsê kerra zî ame viraştene.

Hezar û186 kîlometre xebata rayîrî ameye kerdene

Ekîban reyna taxanê teberî de ke qedîyayî, înan reyde pîya heme rayîran de xebatê xete kenê. Na çarçewa de 302 kîlometre termoplastîk û 884 kîlometre zî serd pêro pîya hezar û 186 kîlometre xebata xeta rayîrî ameye kerdene.

Xebatê pawitiş û tamîrî dewam kenê

Ekîbî hetêk ra rayîr û peyerayîranê neweyan virazenê, hetê bînî ra cayê ke est ê, tede xebatê pawitiş û tamîrî kenê. Bajarî de 13 hezar metrekare kerrayê parke yê kilîtinî û 17 hezar metre bordurî ame tamîrkerdene û newekerdene.