Mudirîya Pêroyî ya DÎSKÎ yê Şaredarîya Amedî ya Şaristanê Girdî seba ke hewcedarîya awa ke aşmanê hamnanî de zêde bena, bajar de bêro temînkerdene, xebatê bîrê sondajî ke Hewza Awa Şimitişî ya Gozelî de akerdî, qedênayî. Do mabênê bîr û depoya awe de girêdayîş bêro kerdene.

Mudirîya Pêroyî ya Îdareya Awe û Kanalîzasyonê Amedî (DÎSKÎ) ke seba temînkerdişê hewcedarîya awa şimitişî ke aşmanê hamnanî de zêde bena, bajar de xebatanê zêdekerdişê kapasîteyî dewam kena, na çarçewa de yew bîrê sondajî yo newe akerd Hewza Awa Şimitişî ya Gozelî de.

Bi encamê xebata ke ekîban kerd, bîrê sondajî ke 550 metreyî xorînîye de sanîye de 45 lître awe dano, awe ame tesbîtkerdene.

Do girêdayîşê depo bêro kerdene

Seba ke bîrê sondajî dekewê xîzmet, prosesê testî bi serkewte ameyî kerdene. Badê ke nimûneyî Tesîsê Safîkerdişê Awa Şimitişî de ameyî testkerdene û encamê înan pozîtîf vejîya, do girêdayîşê awe û depoya Hewza Awa Şimitişî ya Gozelî bêro kerdene.

'Ma bîrê sondajî ard bajarê xo'

Mudirê Pêroyî yê DÎSKÎ Mehmet Şerîfogluyî bale ante ser ke hewcedarîya awa bajarî, goreyê zêdebîyayîşê nufusî û hûmara aboneyan her roje zêde bena û wina va: "Hewza Awa Şimitişî ya Gozelî de ma rojane teqrîben 22 hezar metrekub awa çimeyî gênê. Bitaybetî seba ke vernîya probleman bêro girewtene ke aşmanê hamnanî de eşkenê tedarikê awe de bivejîyê, ma demêko kilm de xebatê bîrê sondajî ke ma ekîban reyde Hewza Awa Şimitişî ya Gozelî de akerd, qedêna û yew bîrê sondajî yo newe yo ke 550 metreyî xorînîye de sanîye de 45 lître awe dano, ard bajarê xo."