Hemşaredarê Şaredarîya Amedî ya Şaristanê Girdî Dogan Hatun, çarçewaya xebatanê hişmendîya komelkî de Baxçeyê Miletî yê Sûrî de şarê ke boya xo girewtêne, înan rê torbayê çopî vila kerdî û derheqê pakîya derdorî de qalî kerdî.
Kampanya "Ez Amedî ra Hes Kena, Lêmin Nêkena" ya ke Şaredarîya Şaristanê Girdî 5ê Hezîranî de seba pakîya derdorî dabî destpêkerdene, çarçewaya aye de park û baxçeyan de gêrayîşî dewam kenê. Park û baxçeyan de şarî reyde rî bi rî qalan de waştişê denge ya ekolojîke û pakpawitişê derdorî yeno kerdene. Fealîyetê ke vizêr şan Baxçeyê Miletî yê qezaya Sûrî de ameye kerdene, Hemşaredarê Şaredarîya Şaristanê Girdî Dogan Hatun, Hemşaredarê Şaredarîya Sûrî Fatma Gulan Onkol û Adnan Orhan, serekê daîreyan û endamê meclîsî beşdar bîy.
Hemşaredaran ke di hetan ra Baxçeyê Miletî ra gêrayî, seba hişmendîya komelkî şarî rê torbayê çopî vila kerdî. Hemşaredar Hatun, şarî reyde parke de qisey kerd, waştiş û pêşnîyazê çareserî goşdarî kerdî û torbayê çopî vila kerdî û derheqê pakîye de waştişê hasasîyetî kerd.
Hemşaredar Hatun: Ma do îşxalanê parkî qebul nêkerê
Hemşaredar Hatunî bale ante ser o ke tayê kesan parkan îşxal kerdo û tede ocax û standî akerdî û va ke hem rewşa îşxalî hem zî babetê ke statuyê Qeraxê Çemê Dîcle xera kenê, do nêrê qebulkerdene. Hatunî dîyar kerd ke ê do tebîetî pak verdê û bipawê.
'Ciwanî bajarî rê wayîr vejîyenê'
Hatun ke ciwananê parkî reyde eleqedar bî, bankanê ke ciwanan de nişte ro û deyîrê ke gîtarî reyde ameyêne wendene, goşdarî kerdî. Hatunî îfade kerd ke ciwanî bajarî rê wayîr vejîyenê û va "Ciwanî, ricaya ma şima ra tena nêeştişê çopî nîyo, ganî ê kesanê ke erzenê, şima ê îqaz zî bikerê."
'Do darî nêrê birnayene'
Şarî, waştişê xo yê sey "Girewtişê rayîrê Baxçeyê Miletî yê trafîkî, nêkerdişê lezî yê wesayîtan, nêgoşdarîkerdişê muzîkî bi vengê berzî, pakpawitişê derdorî û dermankerdişî" ca de beşanê eleqedaran rê vatî û waşt ke bêrê çarekerdene. Hatun, derheqê waştişê domanan yê "darî nêrê birnayene" de zî wina va: "Heta ke ma îdare de bê, qet yew dare zî nêna birnayene."
Şarî keyfweşîya xo îfade kerd
Şarî, keyfweşîya xo seba vurîyayîşanê ke badê îdarekerdişê qeyyûmî de bajar de cuyîyayî, îfade kerdî û sipasîya xo Hemşaredar Hatunî rê kerd.
