Zarokîstan û Keyeyê Pawîtişê Rojkî ke bi nameyê Şaredarîya Amedî ya Şaristanê Girdî do xizmetê zafziwanî bidê, seba serra perwerde û musayîşî ya 2024-2025î dest bi girewtişê qeydan kerd.

Serekîya Daîreya Xizmetê Sosyalî, xebatê xo zêde kerdî ke Zarokîstan û Keyeyê Pawîtişê Rojkî ke demê qeyyûmî de bêfonksîyon mendbî, seba serra perwerde û musayîşî ya newîye amade bibê.

Perwerdeyê verê dibistane

Zarokîstan û Keyeyê Pawîtişê Rojkî yê ke do seba demê perwerdeyî yê neweyî domananê 3-6 serreyî rê bêrê amadekerdene, çarçewaya perwerdeyê verê dibistane de qabîlîyetî bêrê dayene. Domanî, çarçewaya aktîvîteyanê sosyalan de do atolyeyanê drama, muzîk û hunerî ra îstîfade bikerê.

Keyeyanê pawîtişê Rojkî de, taştî, werê nêmrojî û werê mîyaneyî do hetê dîyetîsyenanê pisporan ra bêrê dîyarkerdene û amadekerdene.

Xîzmetê zafziwanî

Zarokîstan û Keyeyanê Pawîtişê Rojkî de aktîvîteyê ke seba verê dibistanî yê, do zafziwan bêrê dayene. Domanî eşkenê mîyanê hefteyî de saete 08.00 ra heta 17.00 kreşanê Zarokîstanan ra îstîfade bikerê.

Muracato peyên 5ê Êlule

Maye û pîyê ke wazenê ke Zarokîstan û Keyeyanê Pawîtişê Rojkî ra îstîfade bikerê, ganî bi nasnameyê domananê xo reyde muracatê xo bikerê.

Qeydanê ke roja îneyê 23ê Tebaxe dest pêkerd, heta 5ê êlule dewam kenê. Şar eşkeno bi muracatkerdişê Zarokîstan û Keyeyanê Pawîtişê Rojkî yê taxanê Bagcîlar û Gurdoganî qeydê xo bikerê.