Hemşaredara Şaredarîya Amedî ya Şaristanê Girdî Serra Bucak, problemê Taxa Mollaalîya Corêne û Taxa Dolu Çarakî yê Qezaya Baglarî ca de kontrol kerdî, seba çareserîya problemanê awe û kanalîzasyonî beşê eleqedarî wezîfedar kerdî.

Hemşaredara Şaredarîya Şaristanê Girdî Serra Bucak, zîyaretê xo yê qezayan dewam kena. Hemşaredare Bucak Hetkarê Sekreterê Pêroyî Reşat Bakan, serekê daîreyan û endamê meclîsî reyde pîya şîye zîyaretê Taxa Mollaalîya Corêne û Taxa Dolu Çarakî yê Qezaya Baglarî.

'Derdê îdareyê qeyyûmî rayîrviraştiş nêbîyo, îhalegirewtiş bîyo'

Hemşaredare Bucak ke taxan de şarî reyde ameye têhet, şarî reyde qisey kerd, goşdarîya waştişanê înan kerde. Bucak ke problemê rayîr, awe û kanalîzasyonî yê her di taxan ca de kontrol kerdî, rayîrê Taxa Mollaalîya Corêne ke demê qeyyûmî de îhale bîbî la seba ke asfalto dîyin nêameyo rokerdene xirabe bîbî, ê kontrol kerdî û va: "Derdê îdareyê qeyyûmî rayîrviraştiş nêbîyo, îhalegirewtiş bîyo. Werrekna wexto ke şîyê nê îhaleyê nêmcetî û nê barî ma rê nêverdayêne.”

'Seba kanalîzasyon û awe destê ma ra çi bêro ma do bikerê’

Bucak seba çareserîya problemanê awe û kanalîzasyonî yê her di taxan beşê eleqedarî wezîfedar kerdî. Bucak dîyar kerd ke rayîrê Taxa Mollaalî de xebata pakerdiş û tamîrî do bêro kerdene û wina va: "Seba kanalîzasyon û awe destê ma ra çi bêro ma do bikerê."

Rayîro ke ameyo akerdene, ci kontrol kerd

Bucak dima şîye rayîrê grûbe yê taxe yê Ortaşar-Yondemlî ke girêdayeyê Qezaya Çinarî yo û 5,5 kîlometre yo ke demê qeyyûmî de îhale bîbî la xebatê ci nêmcet mendbî. Bucak rayîro ke hetê ekîbanê Şaredarîya Şaristanê Girdî ra demêkî ra ver xebatê ci qedîyaybî û ameyo akerdene kontrol kerd.