Şaredarîya Amedî ya Şaristanê Girdî, kontrolê kargehanê ke "Bayraqa Sipîye" girewta, kerd ka ê krîteran ca anê yan ney.

Ekîbê Kontrolê Werdî yê Serekîya Daîreya Karê Weşîye, kontrolanê xo yê ke seranserê bajarî de kenê, tede kargehanê ke şertanê laziman anê ca, înan rê 3, 2 yan 1 estêreyî "Bayraqa Sipîye" danê.

Xebata Bayraqa Sipî de ke kontrolanê mewcûdan ra cîya yo û welatîyan zî gêno zereyê xo û kargehan de kalîte û emnîyetê werdî temîn keno, 50 ra zêde krîterê teknîkî, hîjyenîkî û fîzîkî est ê.

Ekîbî, verê cû seranserê bajarî de kargehan rê melumat danê, dima zî kontrolan kenê.

Kontrolan de; roşnayî ra heta pakîye, ekîpmanê teknîkî ra heta kincê personelî, kalîteya servîsî ra heta pakîya derûdorî seranser yenê kontrol kerdene.

Hedef o yo ke hûmare bibo 300

Kargehanê ke heqê girewtişê Bayraqa Sipî qezenc kenê, înan rê hetê ekîbê Şaredarîya Şaristanê Girdî ra nuşteyê "No kargeh binîzam hetê ekîbanê Kontrolê Werdî yê Şaredarîya Şaristanê Girdî ra yeno kontrol kerdene. Seba cayêko hîjyenîk û weş şima eşkenê tercîhê kargehanê ke Bayraqa Sipîye tede daliqnaye ya bikerê" yeno daliqnayene.

Heta nika bajar de 200 ra zêde kargehan Bayraqa Sipî girewte, hedef o yo ke hûmare bibo 300.

'Bayraqa Sipî belgeyêka kalîteyî ya'

Serekê Daîreya Karê Weşîye Vahap Saçakli ke beşdarê kontrolanê Bayraqa Sipî bîyo, dîyar kerd ke ê kargehanê ke Bayraqa Sipî girewtê, rutîn kontrol kenê.

Saçakliyî dîyar kerd ke tetbîqê Bayraqa Sipî de înan krîterî goreyê Kodeksê Werdî yê Tirkî dîyar kerdê û îfade kerd ke kontrolanê ke ê tim kenê, tede kargehanê ke şertanê teknîkî, hîjyen û fîzîkî de apey şîyayîş bimojnê do bayraqa înan bêro apeygirewtiş.

Saçakliyî wina qisey kerd: "Projeya Bayraqa Sipîye belgeyêka kalîteyî ya ke seba kargehanê ke bajarê ma de est ê û wareyê werdî de xebetîyenê, ameya amadekerdene. Eke yew kargeh wayîrê Bayraqa Sipîye bo, no mojneno ke o kargeh hetê teknîk, hîjyen û fîzîkî ra standartanê laziman ano ca; hetê viraştiş û kalîteyî ra sewîyeya berze de yo. Nika Amedî de 200 ra zêde kargehê ma wayîrê Bayraqa Sipî yê. Ma kargehanê ke badê kontrolan ke ma kenê, heqê girewtişê Bayraqa Sipî qezenc kenê, rutîn her 6 aşman de reyêk kontrol kenê. Nê kontrolanê ke tekrar benê, tede ma kargehanê ke kêmanîya înan est a, înan rê wext danê û wazenê ke ê kêmanîyanê xo temam bikerê."