Şaredarîya Amedî ya Şaristanê Girdî, bi destpêkerdişê serra perwerdeyî ya 2024-2025î wesayîtê servîsê wendegehan û kantînî kontrol kerdî.

Serekîya Daîreya Zabiteyan û yê Karê Weşîye, seba ke wendekaran bi hawayêko emnîyetin biresno û weşîya înan bipawo tedbîrê lazimî girewtî.

Ekîbê Serekîya Daîreya Zabiteyan, wesayîtê servîsan kontrolî kerdî. Ekîban, wesayîtê servîsan de "tabelaya vindertişî, nuşteyê wesayîtê wendegehî, qayîşê emnîyetî, parçeyê zereyî û lastîkî"  kontrol kerdî ke şertanê ke Talimatnameya Wesayîtê Servîsê Wendegehan de dîyar bîyê, anê ca yan ney.

'Kontrolê ma dewam kenê'

Emîrê Mudirîya Şubeyê Zabiteyanê Trafîkî Samî Alakaş va ke seba resê emnîyetinî yê wendekaran înan tedbîrê lazimî girewtî. Alakaşî wina qisey kerd: "Serra perwerdeyî ya 2024-2025î de seba ke wendekarî keye ra heta wendegehî bi hawayêko emnîyetin bêrê berdene, kontrolê ma dewam kenê. Nê kontrolan de ma servîsê ke heqêko zêde gênê, ruhsatê xebate yê înan est o yan çin o, sewbîna rayberê ke pay ra yê û koltuxê zêdeyî est ê yan çin ê, ser o kontrolê ma dewam kenê. Derheqê gazinan de zî gama ke şarê ma xeta xeberdayîşî ya Alo 153î ra ma rê xeber danê, kontrolê lazimî hetê ma ra yenê kerdene."

Kantînê wendegehan yenê kontrolkerdene

Ekîbê kontrolê werdî ke girêdayeyê Serekîya Daîreya Karê Weşîye yê zî, bi akerdişê wendegehan dest bi kontrolê kantînan kerd.

Ekîbî ke kontrolî de goreyê qanûnî mahsulî kantînan de est ê yan çin ê, kontrol kerdî, nê derheqî de wayîrê kantînan û îdareyanê wendegehan rê melumatê lazimî dayîyayî.

Qezayan de Kontrolê Koordînasyonê Kontrolê Werdî 

Koordînasyonê Kontrolê Werdî ke hetê Beşê Werdî yê Serekîya Daîreya Karê Weşîye û şaredarîyanê qezayan ra ameyo awankerdene zî, seba ke wendekarî biresê werdê weşî, qezayan de kontrol kerd.

Kantînê wendegehanê Bismil û Çinarî de mahsulê ke weşîya merdiman tehdit kenê û demê şuxulnayîşê înan vîyarto, ameyî kontrolkerdene û melumatgirewtene.

Şaredarîya Şaristanê Girdî, demê perwerde û musayîşî de do kontrolan dewam bikero.