Mudirîya Pêroyî ya DÎSKÎ yê Şaredarîya Amedî ya Bajarê Girdî, qezaya Karazî de 1800 metreyî xeta awa şimitişî û 1300 metreyî xeta kanalîzasyonî virazena.

Mudirîya Pêroyî ya Îdareyê Awe û Kanalîzasyonî ya Amedî (DÎSKÎ), cayanê neweyê roniştiş ê qezaya Karazî de goreyê planê îmarî û zêdebîyayîşê nufusî yew proje amade kerd.

Çarçewaya proje de seba cayanê neweyan yê roniştiş ê Taxa Yenîşehîrî ya merkezê Karazî 1800 metreyî xeta awa şimitişî û seba ke problemê awa lêmine yê Taxa Şêx Şerafetînî yê merkezî hal bibo 1100 metreyî xeta kanalîzasyonî yena ronayene.

Ekîbê Mudirîya Pêroyî ya DÎSKÎ reyna Taxa Yenîşehîrî ya Merkezî de xeta şebekeyê kanalîzasyonî ronayî û bi no qayde îmkan da ke awa lêmine bi hawayêko weş bêrê dûrîvistene.

Hemşaredarê Karazî ekîbanê DÎSKÎ rê sipas kerd

Hemşaredarê Şaredarîya Karazî Xanim Altindag û Mehmet Şik û Mudirê Şubeyê DÎSKÎ yê Karazî Wehbî Demirkiran xebatê ke Taxa Yenîşehîrî ya merkezî û Taxa Şêx Şerafetînî de dewam kenê, kontrol kerdî û ekîbê teknîkî ra derheqê xebatan de melumatî girewtî.

Hemşaredaran seba xebatan sipasê ekîbanê DÎSKÎ kerd û xebatanê înan de asanîye waşt.