Şaredarîya Amedî ya Bajarê Girdî, seba ke bajar bibo estetîk û keskayî ronayîşê nebatan zêde kena.

Serekîya Daîreya Park û Baxçeyan, seba ke ronayîşê nebatan zêde biko, 2 merkezê cîyayî ke qezayanê Kayapinar û Yenîşehîrî de yê, bi temamî newe ra viraşt.

Xebate de ke do tasarrufêko muhîm bêro kerdene, merkezê ke qezaya Yenîşehîrî de TOKÎ mîyan de yo û 30 hezar metrekare yo, tede seba daranronayîş cayê repîkajî yenê amadekerdene.

18 hezar û 200 darî do bêrê ronayene 

Serekîya Daîreya Park û Baxçeyan, cayê repîkajî ke newe ra viraşto de verê cû 18 hezar û 200 darê tewirê cîya-cîyayan do birono. Ekîbî, darê ke ronayê dima do berê parkanê neweyan, refûj û çatrayîranê bajarî de biresnê herre.

Ronayîşê vile û darûberanê qijan zî do dewam biko

Serekîya Daîreya Park û Baxçeyan, cayê repîkajê neweyî de teberê ronayîşê daran, goreyê îhtîyacanê bajarî vilê amnanî-zimistanî û darê qijî yê tewirê cîya-cîyayan zî do dewam bikera ke rona.

Şaredarîya Bajarê Girdî, seba ke ronyaîşê nebatan hîna berdar bo, merkezê viraştişî ke qezaya Yenîşehîrî de yo û serrê dergî bî ke nêameyo pawîtene û tamîrkerdene, ey zî bi temamî newe ra viraşt.

Darî ameye berdene merkezê fîdanlikî yê neweyî rê

Xebata ke ameya kerdene, tede darî, merkezê ronayîşî yê Serekîya Daîreya Park û Baxçeyan ke 95 hezar metrekare yo û sînorê qezaya Kayapinarî de yo, uca ameyî berdene. Ekîban, 1598 darê ke tewirê înan cîya yê û ameye berdene, pawîtişê înan kerd.

Prosesê berdişê nebatanê daranê qijan de zî ekîban, şitil û darê qijî ke ameyî ardene, înan rê zibil, derman da..

Mudirê Şubeyê Fîdanlik û Darûberinkerdişî Hemdullah Yarayî derheqê xebatan de ke ameyê kerdene, melumat da û va ke seba nebatronayîşî Seyrantepe TOKÎ û Dîclekentî de di cayê înan est ê.

Yarayî dîyar kerd ke nê di cayan de seba ke bajarî cayê cîya-cîyayan de bigîrê xebate, vilê amnanî-zimistanî, darê qijî û şitilî virazenê û va ke bi xebatanê xo cayê repîkajî, depo û serrayî newe ra viraştî.

Bi nê xebatannebatan do teber ra hêrînayîşê nebatan kêm bibo

Yarayî va ke bi nê xebatan hedefê înan o esasî o yo ke Şaredarîya Amedî ya Bajarê Girdî hêrînayîşê nebatanê teberî %40 kêm bikero û wina dewam kerd: "Verê cû demê qeyyuman de tena ronayîşê vilanê demkîyan bi qasêko kêmî ameyêne plankerdene. Tayê zî darê qijî ameyêne ronayene la bes nêbîyêne nê bajarî rê. Hedefê ma o yo ke ma nê bajarî ra teber şaredarîyanê qezayan rê zî hetkarîye bikerê û vilê demkî û darê qijî ronê û bidê."

Amed do bibo bajarê gulan

Yarayî dîyar kerd ke gulî zaf bi Amedî yenê û mîyanê hedefanê înan ê verênan de ronayîşê gulan est o û va ke gule nê bajarî de nebatêka adaptebîyaye ya coka do hîna zêde nê wareyî ser o bixebetîyê.

Yarayî va ke emser hedefê înan o yo ke 10 hezar şitilê gulan virazê û bi nê tewir xebatan do Amedî bikerê bajarê gulan.

Hedef serrêk de 3 mîlyon û 100 hezar nebatan ronayîş o

Yarayî va ke projeyê cayê fîdanlikî yê Dîclekentî cayanê ke lazim ê, înan rê pêşkêş kerdo û wina dewam kerd: "Eke projeyê cayê fîdanlikê ma yê neweyî yê Dîclekentî bêro ronayene, ma hedef kenê ke serrêk de 3 mîlyon vilê demkî û 100 hezarî zî darûberî ronê."

Xebate do îstîhdamê cinîyan zî zêde bikero

Yarayî va ke ê wexto ke plansazîye kenê tena viraştişê nebatan nê, eynî wext de îstîhdamê cinîyan zî fikirîyenê û wina qisey kerd: "Projeya ma est a ke hem îstîhdam hem zî cinîyê ke çêyan ramenê do bieşkê ehlîyetê ronayîşî bigîrê. Xebatê ma yê cayê repîkajî yê fîdanlikê TOKÎ de zî do wina bo. Ma demê verênan de mecbur mendêne ke 10 hezaran zafêr darûberan teber ra bigîrê. Ma hedef kenê ke badê neweronayîşê cayê repîkajî ma na hûmare %50 kêmî bikerê. Yanî no zî bi pereyî hûmarêko cidî yo. Bi kilmîye, ma bi xebatanê xo yê ke her di cayê fîdanlikan de kenê, ma wazenê ke girêdayeyîya teberî kêmî bikê, heta sifir bikê. Ameyoxî de ma plan kenê ke şaredarîyanê merkezî û qezayan rê zî hetkarîye bikê."