Hemşaredarê Şaredarîya Amedî ya Bajarê Girdî Dogan Hatun, Taxa Tilhamî de ame têhet şarî reyde û va ke ê do problemê rayîrê taxe çareser bikê.

Hemşaredarê Şaredarîya Bajarê Girdî Dogan Hatun, Taxa Tilhamî ya girêdayeyê qezaya Yenîşehirî zîyaret kerd û şarî reyde ame têhet. Hatun qehwexaneyê taxe de şarî reyde qisey kerd, waştiş û problemê înan goşdarî kerdî. Hemşaredar Hatun derheqê rayîrê taxe yê plankerdeyî de tesbîtî kerdî û va ke ê do problemê rayîrê 4 kîlometreyî yê Taxa Tilhamî çareser bikê.

'Xizmetê mecburî nêameyê kerdene'

Hemşaredar Hatunî bale ant zerarê ke îdareyê qeyyûmî bajar de viraştê ser û va ke xizmetê mecburî nêameyê kerdene, bi butçeya şaredarîye sazgehanê resmîyan rê awanî virazîyayê. Hatunî va ke badê ke ê ameyî karî, înan tesbît kerdo ke merkezê bajarî de 24 kîlometre xeta kanalîzasyonî xirabîyaya û 12 kîlometreyê na xete tamîr û weşkerdişê ci kerdo. Ey va "Eke ma nêkerdêne, varayîşo ke vizêr vara, bajar berdêne."

'Ma xebata 4 serran kerde'

Hatunî va ke gama ke ê 5 aşm û nêmî ra dima agêrenê û nîyadanê peyê xo ra, înan xebata 4 serran kerda, la seba ke hema problemî zaf ê, zerrîya înan rehet nîya. Ey va ke ê do bi nê tempoyî xebatanê xo dewam bikê.

'Ma hesabê 5 serran kenê'

Hatunî qeyd kerd ke dewan rê xizmetê rayîr, awe û kanalîzasyonî nêdîyayo û wina va: "Ma hesabê rojane nêkenê. Ma hesabê 5 serran kenê. Yew weçînayîşî ra heta bînî. Ma planê xo yê stratejîkî goreyê naye hazir kenê."

'Ganî Rayîrê Roma bêro pawîtene'

Hatun, rayîrê Roma yo tarîxî de ke nêzdîyê rayîrê taxe de yo, tesbît kerd û va ke seba ocaxê qumî yê mintiqa, ci ser o pird virazîyayo. Ey qeyd kerd ke no rayîr 2 hezar serre yo û wina dewam kerd: "'Rayîrê Roma' bêwayîr mendo. Cayêko tarîxî yo. Ganî bêro xebitîyayene û bêro pawîtene. Uca ocaxê qumî ronayo, no ci rê bêhurmetî yo."

Hemşaredar, karkerê pemeyî zîyaret kerdî

Hemşaredar Hatun, badê zîyaretê taxe rayîrê xo ser o erdê pemeyî de karkerî zî zîyaret kerdî, înan reyde qisey kerd û peme arê da.

Zîyaretê taxe de Hemşaredarê Şaredarîya Yenîşehirî Mehmet Ergun, Hetkarê Sekreterê Pêroyî yê Şaredarîya Bajarê Girdî Azîz Ozdogan, serekê daîreyan û endamê meclîsî Hemşaredar Hatun reyde bîy.