Şaredarîya Amedî ya Bajarê Girdî, seba ke cinîyan rê warê neweyî yê karî akero û hetkarî bido seypêyîya cinsîyetê komelkî, dest bi Projeyê Perwerdeyê Ehlîyetê Şoforîya Otobuse yê Cinîyan kerd.

Hetê Serekîya Daîreya Xizmetanê Cinî û Keyeyan û Serekîya Daîreya Resî ra Projeyê Perwerdeyê Ehlîyetê Şoforîya Otobusî yê Cinîyan ame awankerdene. Bi projeyî hem şoferê otobusî yê cinî yenê resnayene û warê neweyî yê karî cinîyan rê yenê akerdene hem zî hetkarîdayîşê seypêyîya cinsîyetê komelkî ameyo hedefkerdene.

Proje de do 25 cinîyê ke Amedî de ciwîyenê û emrê înan 24-35 yo, seba şoforîya otobuse bêrê perwerdekerdene.

Muracatan dest pêkerd

Muracatanê ke 25ê êlule de dest pêkerd, heta 14ê teşrîna verêne do adresê https://kadinsofor.diyarbakir.bel.tr/ ser o bêrê kerdene.

Badê muddetê muracatî, kesê ke şertanê munasiban anê ca, do înan reyde mulaqat bêro kerdene.

Programê perwerdeyî yo hîra

25 namzedê şoferê otobuse yê cinî ke heqê vîyartişê mulaqatî qezenc kenê, do bi hemkarîya kursanê şoforîye perwerdeyê teorîk, teknîk, pratîk û cayî bigîrê.

Badê ke prosesê girewtişê ehlîyetê cinîyan qedîya, hetê Şaredarîya Amedî ya Bajarê Girdî ra do 1 aşme 6 saetî yew perwerdeyê bînê pratîk-cayî bêro dayene.

Kursê Ehlîyetî û Belgeyê Şoforîye

Mesrefê perwerdeyê kursî û belgeyê şoforîye yê ke projeyî de benê, do hetê Şaredarîya Amedî ya Bajarê Girdî ra bêrê dayene.