Mudirîya Pêroyî ya DÎSKÎ yê Şaredarîya Amedî ya Şaristanê Girdî, seba ke hewcedarîya awa şimitişî yê 4 qezayanê merkezî û taxanê dewan temîn bikero, 6 aşmanê peyênan de pêro pîya 13 hezar û 800 metre xeta awa şimitişî ronaye.

Mudirîya Pêroyî ya Îdareyê Awe û Kanalîzasyonî ya Amedî (DÎSKÎ), seba ke her cayê bajarî de awa şimitişî ya bêvindertene û weşe temîn bikero xebatanê xo dewam kena. Ekîbê DÎSKÎ, seba ke hewcedarîya awa şimitişî ya qezayanê Baglar, Sur, Kayapinar û Yenîşehîr û mahaleyê dewan yê girêdayeyê înan temîn bikero, 13 hezar û 800 metreyî xeta şebekeyê awa şimitişî ronaye.

6 hezar û 770 metre girêdayîşê aboneyanê neweyan virazîyayî

1ê Nîsane û 27ê Êlule mabênê nê tarîxan de seba ke hewcedarîya awa şimitişî ya keye û cayê bazirganîye temîn bibo, 4 qezayanê merkezî û taxanş dewan de 6 hezar û 770 metre xeta şebekeyî de 450 girêdayîşê aboneyanê neweyan ameyî viraştene.

2 hezar û 109 arizayan rê ca de mudaxele bî

Ekîbê ke girêdayeyê Serekîya Daîreya Awa Şimitişî yê, tespîtê ke cayê xo de ameyî kerdene û îxbaranê ke hetê ALO 153 rê ameyî, goreyê înan qezayanê Yenîşehîr, Baglar, Kayapinar û Surî de hetanî 1ê Nîsane 2 hezar û 109 arizayê awa şimitişî tamîr kerdî.

'Vernî ameye girewtene ke sanîye de 525 lîtreyî awe fuzulî nêşêro'

Mudirê Şubeyê SCADA û Sîstemê Melumatê Cografîkî yê DÎSKÎ Ahmet Arslanî derheqê babete de melumat da û bale ant muhîmîya tasarufê awe ser û dîyar kerd ke seba temînkerdişê hewcedarîya awa şimitişî ya 4 qezayanê merkezî yê bajarî û taxanê dewan de13 hezar û 800 metre şebeke ronayî. Arslanî qeyd kerd ke hewcedarîya awa şimitişî ya nê taxan ame temînkerdene û wina va: "Hetanî 1ê Nîsane badê kontrolê fizîkî yê fînayîşan bi cîhazanê goşdarîkerdişî yê akustîkî 425 hebî xirabî ameyî tespîtkerdene û tamîrkerdene. Bi saya nê xebatanê tamîrî vernî ameye girewtene ke sanîye de 525 lîtreyî awe beyhude nêşêro û tasarufê awe ame kerdene. Ma sey Mudirîya Pêroyî ya DÎSKÎ do xebatanê xo bêvindertene dewam bikerê seba ke hewcedarîya awa weşe û bêvindertene yê şarê ma bêro temînkerdene."