Hemşaredara Şaredarîya Amedî ya Şaristanê Girdî Serra Bucak, Tesîsê Safkerdişê Awa Şimitişî de heme qonaxê ke awa tede vîyarena cayê înan de kontrol kerdî û bale ant muhîmîya tasarufa awe ser o.

Hemşaredara Şaredarîya Şaristanê Girdî Serra Bucak, Tesîsê Safkerdişê Awa Şimitişî ke Taxa Talaytepe ya qezaya Kayapinarî de yo û rojane 282 hezar metrekub awe pak keno û dano bajarî, zîyaret kerd. Zîyaretî de Hemşaredare Bucak reyde, Hetkarê Mudirê Pêroyî yê Îdareya Awe û Kanalîzasyonî ya Amedî (DÎSKÎ) Serdar Arslan û Mehmet Harun Vural, Sereka Daîreya Tesîsanê Awe Ozgul Hillez û endamê meclîsî amade bîy.

Hemşaredare Bucak tesîsî ra gêra

Hemşaredara Bucak ke hetê Hetkarê Mudirê Pêroyî yê DÎSKÎ û personelî ra ameye pêşwazîkerdene, personelan reyde sohbet kerd, derheqê Tesîsê Safkerdişê Awa Şimitişî û xebatan de amirê yewîneyanê eleqedaran ra melumat girewtî.

Dima Hemşaredare Bucak Tesîsê Safkerdişê Awa Şimitişî ra gêra, heme qonaxê awa şimitişî cayê xo de kontrol kerdî.

'Seba tasarufê awe ganî komel de hişmendî bêro viraştene'

Hemşaredare Bucak va ke ganî xebatê Tesîsê Safkerdişê Awa Şimitişî hîna zaf bêrê dîyayene û îfade kerd ke seba ke qonaxê ke awa tede vîyarena bêrê îzahkerdene û seba ke derheqê tasarufa awe de komel de hîşyarî û şinasnayîş bêro viraştene, yew merkezêk şeno bêro ronayene.