Şaredarîya Amedî ya Şaristanê Girdî, programanê ke munasebetê Hewteyê Îtfaîye de ameyî organîzekerdene, tede 50 hezar wendekaran rê perwerdeyê adirî da.

Şaredarîya Şaristanê Girdî, munasebetê Hewteyê Îtfaîye ke mabênê 25ê Êlule-1ê Teşrîna Verêne de yeno pîrozkerdene, wendekaran rê perwerdeyê teorîk û pratîkî dayî.

60 sazgehanê perwerdeyî de wendekarî ameyî mêmankerdene

Grûba Kayapinarî yê Serekîya Daîreya Îtfaîye de, seba wendekaranê ke 60 merkezê perwerdeyî de musayîş û perwerde gênê, perwerdeyê adirî ameyî organîzekerdene. Fealîyetan de wendekaran rê perwerdeyê teorîk û pratîkî ameyî dayene, tedbîrê ke do seba vernîgirewtişê adirî bêrê girewtene ameyî îzahkerdene.

Çarçewaya perwerdeyî de ke hedef o bî ke domanî bi keyf bimusê, wendekaran rê ekîpmanê îtfaîye û wasitayê temirnayîşê adirî ameyî dayîşşinasnayene.

40 mekteban de perwerdeyê mudaxeleyê adirî

Kreş û Keyeyê Miqateyê Rojkî yê 450 Evlerî de hetê personelanê îtfaîye ra perwerdeyê teorîk û pratîkî yê mudaxeleyê adirî wendekaran rê ame dayene.

Heta nika çarçewaya Hewteyê Îtfaîye de merkezê bajarî û qezayan de pêro pîya 40 mekteban û Merkezê Ciwanan yê Licê de perwerdeyê melumatdayîşî ameyî organîzekerdene.

Perwerdeyê ke hewteyêkî de 50 hezar wendekaran rê ameyî dayene, tede derheqê "Sebebê vejîyayîşê adirî, çîyê ke ganî bêrê kerdene ke adir nêvejîyo û tedbîrê ke do bêrê girewtene, eke adir vejîya çîyê ke ganî bêrê kerdene, wezîfeyê îtfaîye" de bi detay melumat wendekar û mamostayan rê ame dayene.

Perwerdedayoxan ke derheqê hacet-cîhazê şewatî de wendekar, mamosta û karkeran rê melumat da, metodê mudaxeleyê adirê sey, awe û gazî bi hawayêko pratîk tetbîq kerdî.

7 sazgehanê şarî de tatbîqat 

Serekîya Daîreya Îtfaîye hetê çarçewaya fealîyetan ra 7 sazgehanê şarî de ke nêweşxaneyî zî tede bîy, perwerde da û tatbîqatî kerdî.

Serekîya Daîreya Îtfaîye, pêroyê serre de seba ke bala şarî bianco şewatan ser o, do fealîyetanê perwerdeyî dewam bikero.