Esnafê Kuçeyê Hunerî vanê ke ê Aşxaneyê Şarî ra ke Şaredarîya Amedî ya Bajarê Girdî seba ke werdanê pak, lezîz û erjanan pêşkêş bikero viraşta, keyfweş ê û vanê "Ma bi xo zî şonê uca wer wenê. Werê zaf weşî vejîyenê û munasîb ê. Aşxane reng û ciwîyayîşêko bîn dayo kuçe."

Şaredarîya Bajarê Girdî, seba ke mesafeyê mabênê ameyeyê şarî teng bikero û werê erjan, pak, lezîz û ewle pêşkêşê şarê bajarî bikero, 29ê Tebaxe de Kuçeyê Hunerî ke Taxa Kooperatîfan yê qezaya Yenîşehîrî de yo, Aşxaneyê Şarî akerd. Aşxaneyê Şarî ke roja Yewşemeyî ra teber her roje mabênê saete 12.00-18.00 akerde yo, bi 4 tewir weran rojane hezar kesan rê xîzmet dano.

Aşxaneyê Şarî esnafan ser o tesîrêko baş kerdo

Aşxaneyê Şarî ke şarî zaf eleqe nîşan dayo, esnafan ra zî noto rind girewto. Esnaf Cemal Akinî va ke akerdişê Aşxaneyê Şarî Kuçeyê Hunerî de înan ser o tesîrêko baş kerdo û aşxane reng û ciwîyayîşêko bîn dayo kuçeyî.

Akinî va ke ê erjanîya weran ra keyfweş ê û wina dewam kerd: "Teber ra yew durumê kerge 80-100 TL yo. La nika Aşxaneyê ma yê şarî de 4 tewir weran danê û tena 70 TL yo. Eke ma muqayese bikerê, cayêna de eynî werî 300-400 TL yê."

'Werê ke keyeyan de nêeşkenê biwerê, yenê tîya de wenê'

Akinî va ke aşxane zaf pak û hîjyenîk o û wina dewam kerd: "Ganî nê tewir xîzmetî zêde bibê û aşxane qezayanê Amedî yê qelebalixan de, cayanê merkezîyan de zî bêro akerdene. No xîzmet çîyêko zaf rind o. Bawer bikerê heme kesê ke tîya de werdan wenê û şaredaranê ma rê dua kenê. Çunke bi raştî zî werê ke keyeyan de nêeşkenê biwerê, bi rehetî yenê tîya de wenê. Ma zî ge-ge wenê. Ma kontrol kenê, bi raştî zî werî weş ê û ca zî hîjyenîk o. Coka zî ma zaf sipas kenê rayberîya herêmkî û Hemşaredaranê Şaredarîya Bajarê Girdî rê."

'Faydeyê ci ma rê zî est o'

Esnaf Melik Medenî keyfweşîya xo ya ke Aşxaneyê Şarî Kuçeyê Hunerî de xîzmet dana, îfade kerd û va: "Xebatêka rind a, netîce de şarê ma yo ke rewşa ci ya maddî xirab a, est o. Ma bi xo zî şonê uca ge-ge cemêk wer wenê û werî zî zaf weş vejîyenê û munasîb ê. Cayêna de ma şonê werêkî wenê, hesabê yew kesî 400-500 TL yo la tîya zaf munasib o. Ma nê halî ra keyfweş ê, faydeyê ci ma rê zî est o. Bi no hawa kuçeyê ma zî bîyo zergûn. Kuçeyê ma de zaf qelebalixîye est a.  Şar yeno tîya de werê xo weno û dima yeno dikan û cafeyanê ma de ronişeno, her tewir feydeyê xo ma rê est o”

"Wa Aşxaneyê Şarî heme cayê Amedî de bibê"

Esnaf Saît Çakarî bale ant feqîrîya bajarî ser o û va: "Ma wazenê Aşxaneyê Şarî heme cayê Amedî de bibê. Çunke şarê Amedî feqîr o. Zafê ci bêkar ê. Werekna şaredarîya ma hîna zaf îmkanê ci bibîyêne û her ca de akerdêne. Zaf kesî est ê ke bi aşman goştê sûrî nêwenê. Goştê sûrî ca de verdê, nêeşkenê goştê kerge zî biwerê."

'Xizmetêko zaf rind bîyo'

Esnaf Macît Açişî zî va ke her kes xizmetî ra keyfweş o û wina îfade kerd: "Çîyêko zaf rind kerdo. Gamêka zaf rinde eşta. Ma wazenê nê tewir xizmetî her ca de bibê. Her çî zaf vay bîyo. Êdî kes nêeşkeno şêro cayêk de werêkî biwero. Wendekarê ma nêeşkenê şêrê tesîsanê bînan de werêkî biwerê. Çunke pereyê înan nêreseno. Xizmetêko zaf rind bîyo."

Esnaf Metîn Yikilmazî zî bale ante ke vayîya cuye û şertê cuye zaf çetin ê û va ke akerdişê Aşxaneyê Şarî Kuça Hunerî de faydeyê xo esnafan rê zî est o. Yikilmazî wina va: "Ez fikirîyena ke Aşxaneyê Şarî ganî bibo. Esnafê ke tîya de est ê, kesê ke kîştê xo de 3-4 kesî xebitnayêne mesela rojane kesê 400-500 TL nêeşkayêne bidê teber. Aşxaneyê Şarî seba înan zî çîyêko zaf rind bi."

'Menuyê ma yo ke tim vurîyeno, est o'

Werdpewjê Aşxaneyê Şarî Hacî Kasamakî va ke ê keyfweşîya şarî gênê çiman ver û wina menuyê werdan virazenê. Kasamakî va: "Şarê ma zaf keyfweş o. Ma 4 tewir weran bi 70 TL’yî danê tîya de. Şarê ma dûa keno ma rê, zaf keyfweş ê. Rojane 4 tewir werdê cîya-cîyayî vejîyenê. Menuyê ma yo ke tim vurîyeno, est o. Şarê ma bi hawayêko eyînî û biwaştiş her roje yeno tîya."

Karkerê Aşxaneyê Şarî Îkramî Dengizî va ke ê Aşxaneyê Şarî de xizmetê werdî danê şarî û waştişêko zaf zêde est o, şar keyfweşîya xo ya ke cayêko winasî ameyo akerdene, tim înan rê îfade keno.

'Ma fikirîyenê ke şubeyê dîyin û hîrêyinî akerê'

Koordînatorê Pêroyî yê MED A.Ş. yê îştîrakê Şaredarîya Bajarê Girdî Ozcan Ortaçî va ke Aşxaneyê Şarî ke binê banê Şaredarîya Bajarê Girdî de ameya akerdene, şarî het eleqeyêko eyînî dîyo û wina dewam kerd: "Ma seba Aşxaneyê şarî ke ma akerda reaksîyonê weşî girewtî, coka ma fikirîyenê ke ma şubeyê dîyin û hîrêyinî zî akerê."