Hemşaredarê Şaredarîya Amedî ya Şaristanê Girdî Serra Bucak û Dogan Hatun, beşdarê kombîyayîşê meclîsê Yewîya Şaredarîyanê Tirkîya ke Enqere de ame organîzekerdene, bîyî.

Kombîyayîşê meclîsî yê aşma Teşrîna Verêne yê Yewîya Şaredarîyanê Tirkîya (TBB) Enqere de ame viraştene. Kombîyayîşo ke awanîya Merkezê Pêroyî yê TBB’yî de bi serekîya Serekê Şaredarîya Îstanbulî ya Şaristanê Girdî û Serekê TBBî Ekrem Îmamogluyî ame viraştene, tede Hemşaredarê Şaredarîya Amedî ya Şaristanê Girdî Serra Bucak û Dogan Hatun, Hemşaredarê Şaredarîya Mardînî ya Şaristanê Girdî Ehmed Turk, Hemşaredarê Şaredarîya Wanî ya Şaristanê Girdî Neslîhan Şedal û Ebdullah Zeydan reyde serekê şaredarîyan, endamê encumen û meclîsî beşdar bîyî.

Kombîyayîşê meclîsê TBB’yî de nê babetî ameyî munaqeşekerdene: "Planê Stratejîk yê 2025-2029", "Qanûnê Teşkîlatê Yewîye", "Viraştişê/Wedaritiş û Vurîyayîşê Kadro/Dereceyî reyde Awankerdişê Mudirîyan û Vurîyayîşê Nameyê Mudirîyan", "Dîyarkerdişê Ucretê Personelanê Peymankerdeyan", "Programê Performansî yê Serra 2025î", "Butçeyê Malî yê Serra 2025î", "Akerdişê Ofîsê Têkilîye yê TBB’yî Bruksel de", "Viraştişê Weçînayîşî seba Endametîya Encumenî ya ke Veng Mendî ya".