Şaredarîya Amedî ya Şaristanê Girdî, gedeyanê Ben û Senî rê perwerdeyê îtfaîye û emnîyetê trafîkî da.

Serekîya Daîreya Xizmetanê Komelkîyan, seba ke gedeyî derheqê îtfaîye û emnîyetê trafîkî de bibê wayîrê melumatan, perwerdeyanê pratîk û teorîkan organîze kena. Na çarçewa de seba gedeyanê Ben û Senî yê mabênê 12-14 serran de 2 rojî Parka Perwerdeyê Trafîkî û gêrayîşê îtfaîye ame organîzekerdene.

Gêrayîş ke Amîrîya Îtfaîye ya girêdayeya Serekîya Daîreya Îtfaîye de ke Qezaya Kayapinarî de ya, dest pêkerd, gedeyan rê wasitayê peysnayîşê şewatî ameyî şinasnayene. Gedeyan rê derheqê vînderitişê şewatan û çîyê ke eşkenê bibê sebebê şewatî de malumat ame dayene.

Gedeyan rê perwerdeyê emnîyetê trafîkî ame dayene

Dima gedeyî seba perwerdeyê trafîkî berdî Parka Perwerdeyê Trafîkî. Tîya de zî gedeyan rê derheqê meseleyanê trafîkî de perwerdeyê teorîk û pratîkî hetê perwerdekaran ra ke warê xo de pispor ê, ameyî dayene. Perwerdeyî de gedeyan rê derheqê qaydeyan de ke gama ke rayîr ra şîyene û bîyene rayîrwan ganî bêrê musnayene, malumat ame dayene.

Muhîmîya qayîşê emnîyetî ameye îzehkerdene

Seba ke gedeyî çilayê trafîkî û servîyerî sey meseleyanê muhîman fehm bikerê, çilayê trafîkî û servîyero ke bi hawayê minyaturî ameyo viraştene ame şuxulnayene. Reyna wasitayê sîmulasyonî ke bale ancenê muhîmîya qayîşê emnîyetî ser o, ci reyde gedeyan rê malumatê detayinî ameyî dayene.

Wendekaran rê belgeya beşdarîye ameye dayene

Parke de heme wendekaran rê ke perwerdeyê xo bi serkewtene qedênayî, belgeya beşdarîye ameye dayene, gedeyan rê kek û awa fêkî ame îkramkerdene, şewqa û fîrike ameyî dîyarîkerdene.