Hemşaredara Şaredarîya Amedî ya Şaristanê Girdî Serra Bucak, derheqê dewaya Narîn Guran de ke heqê cuya ci ameyo binpaykerdene, beyanatê xo de va ke heta ke sucdarî cezayê xo bigîrê, ma do dewa dima vindê.

Hemşaredarê Şaredarîya Şaristanê Girdî Serra Bucak û Dogan Hatun, beşdarê dewaya verêne ya Narin Gurana 8 serrî bîy ke 21ê Tebaxe de Taxa Tavşantepeyî ya Qezaya Baglarî de vîndî bîbî û meyîtê ci 8ê Êlule de Çemê Egertutmazî de ameybî dîyayene. Dewaya verêne Dadgeha Cezaya Girane ya 8. ya Amed de dest pêkerd.

'Ma pîya yê ke vajê ma na dewa dima yê’

Hemşaredare Bucak, verê dewa beyanat da û va ke aktîvîstê heqanê gedeyan, aktîvîstê xebatanê cinîyan, parlementerî û rayberîyê herêmkî pîya, seba ke her deqaya dewaya verêne ya qetilkerdişê Narin Guran taqîb bikê, pîya yê.

Hemşaredare Bucak wina qisey kerd: "Ma pîya yê ke vajê ma do na dosya dima yê û heta ke yew mehkemakerdişo pak, adîl û azad nêro meydan û heta ke sucdarî cezaya xo nêgîrê, ma do na dwa dima bibê."

'Ma do pîya hereket bikê'

Bucak, ke dîyar kerd ê seba vengdayîşê heqê cuye yê hemê doman û cinîyan ke şexsê Narînî de ameyê qetilkerdene pêra yê û wina dewam kerd: "Helbet nê qetilkerdişî bi Narîn nêqedîyayî. Çi heyf ke ma badê Narîne, Rojin Kabaîş vîndî kerde, dima Şirin Elmas ameye qetilkerdene. Seba ke nê qetilî dewam nêkê, ganî ma bêrê têhet û heme komelê sivîlî, dînamîkê bajarî, rayberîyê herêmkî; wareyê gedeyan de, wareyê azadî û seypêyîye de, wareyê cinsîyetê komelkî de pîya xebatan biramnê. Ma cinî nêmeyê komelî yê, seypêyîyaya cinsîyetê komelkî, têkoşînê vera şîdetê cinîyan, vindarnayîşê qetilkerdişê cinîyan pêroyê nînan hem berpirsîyarîya rayberîyê herêmkî hem parlementeranê weçînayeyan hem zî yê aktîvîstan a. Ma do demê ameyoxî de bi na berpirsîyarîye pîya hereket bikê, ma do planê xebate eşkera bikê."

Hemşaredare Bucak ke 25ê Teşrîna Peyêne Roja Têkoşînê vera Şîdetê Cinîyan arde vîr û qiseykerdişê xo wina qedêna: "Gama ke 25ê Teşrîna Peyêne Roja Têkoşînê vera Şîdetê Cinîyan nêzdî bena, ez wazena tîya ra, verê cû qetilkerdişê Narîn û heme gede û cinîyanê ke ameyê qetilkerdene bîyarî vîr û têkoşînê înan hîna gird bikerî û îddîayê xo yê viraştişê komelêkê bêşîdetî reyna vajî."

Badê nê beyanan Hemşaredarî Bucak temsîlkarê rêxistinanê sivîlan reyde beşdarê dewa bîyî.