Şaredarîya Amedî ya Şaristanê Girdî, Fuarê Mezopotamya Gurme û Lezzetanê Herêmkîyan de tarîx, kultur û lezzetanê bajarî dana şinasnayene

Fuarê 6. yê Mezopotamya Gurme û Lezzetanê Herêmkîyan ke hetê Odaya Tîcaret û Sanayî ya Amedî (DTSO) û Mezopotamya Fuarî ra organîze beno û Şaredarîya Şaristanê Girdî piştî dano, dewam keno.

Şaredarîya Amedî ya Şaristanê Girdî ke bi standê xo fuarî de ca gênê, tarîx, kultur û lezzetanê bajarî zîyaretkeran rê daşinasnena.

'Ma şarê xo pawenê ke bêrê standê ma'

Koordînatora Turîzmî ya Mudirîya Şefîya Turîzmî ya girêdayeya Serekîya Daîreya Kultur û Karanê Sosyalan Tulay Çelîk derheqê xebatanê fuarî de nê çîyî vatî: "Ma hem derheqê tarîx û şinasnayîşê werdanê herêmkîyan ê bajarî de xebatê cîya-cîyayî kenê. Ma zîyaretkeranê ke yenê standê ma rê derheqê şinasnayîşê tarîxê bajarî de materyalan vila kenê û eynî wext de ma derheqê şinasnayîşê lezzetanê herêmkîyan de xebatê qijkekî kerdî û dewam kenê ke bikê. Ma pawenê ke şarê ma bêro standê ma."

'Eleqeyêko pîl esto'

Çelîk dîyar kerd ke fuar eleqeyêko pîl vîneno û va: "Ma vînenê ke beşdarîyêko pîl xebatanê şinasnayîş û îkramê Şaredarîya Amedî ya Şaristanê Girdî yê zîyaretkeran rê est o. Çunke xebate derheqê kulturê bajarî de ya, Dîwanê Dengbêjan eleqeyêko pîl dî. Seba ke ma lezzetanê herêmkîyan şinasnê, standê ma eleqeyêko pîl vîneno."

'Viraştişê xebatanê winasî Amedî de muhîm o'

Hesen Kayayî ke seba ke beşdarê fuarî bibo Trabzon ra ameyo wina qisey kerd: "Ma Amed ra hes kenê, ma bi heskerdiş û bi vazdayîşî yenê Amed. Amed cayêko zaf rind o, viraştişê xebatanê winasî Amed de muhîm o. Ma zî Trabzon ra nê xebatî de beşdar bîyê û ma bi şanazî mahsulê xo, mahsulê herêmkî yê xo Amed de şarê xo rê ronenê, şinasnê. Ma wazenê ke xebatê winasî dewam bikê."

Kayayî dîyar kerd ke standê Şaredarîya Şaristanê Girdî hetê daşinasnayîşê bajarî ra bale anceno û va: "Ez nika standê Şaredarîya Amedî ya Şaristanê Girdî de ya. Ez sipasê Şaredarîya Amedî ya Şaristanê Girdî kena ke îmkan dayo ma ke ma lezzetanê herêmkîyan ê Amed bişinasê."

Heta 17ê Teşrîna Peyêne akerde yo

Fuarê 6. yê Mezopotamya Gurme û Lezzetanê Herêmkîyan ke 170 şîrketî 59 bajaran ra tede beşdar bîyê, heta 17ê Teşrîna Peyêne do zîyaretkeran mêman biko.