Şaredarîya Amedî ya Şaristanê Girdî dest bi tetbîqê JINKARTî kerdo ke seba cuya cinîyanê ke ameyeyê înan çin o, asan biko û cinîyî nê tetbîqî ra keyfweş ê.

Serekîya Daîreya Xizmetê Cinî û Keyeyî seba tetbîqê JINKARTî ke seba asankerdişê cuya rojane ya cinîyanê mabênê 18-64 serran de ke sîgortaya înan çin a dest pê kerdo, 8 hezar û 820 vermuraceatî ameyî kerdene.

Muraceatî hetê komîsyonî ra ke tede Serekîya Daîreya Xizmetê Cinî û Keyeyî, Serekîya Daîreya Çapemenî û Têkilîyanê Şarî, Serekîya Daîreya Xizmetanê Sosyalan, endamê meclîsê şaredarîye û şaredarîyê qezayan est ê, ameyî kontrol kerdene. Badê ke yew bi yew ameyî kontrol kerdene, 7 hezar cinîyî ke şertê muraceatî temîn kerdêne, bi SMS’î ameyî xeberdarkerdene.

4 hezar cinîyan JINKART girewt

Cinîyê ke şertê muraceatî temîn kenê, JINKARTê xo beşê Çareya Cayî de yê Şaredarîya Şaristanê Girdî ra gênê. Heta nika 4 hezar cinîyan JINKART girewto û dest pê kerdo ke bişuxulnê.

Cinîyê ke bi SMSî ameyê xeberdarkerdene, eşkenê kartanê xo beşê Çareya Cayî de yê Şaredarîya Şaristanê Girdî ra vera-vera bigîrê.

Cinîyî do bi JINKARTî ke menge de 90 wenîştiş tede yo, tesîsê sosyalî û şîrketanê Şaredarîya Şaristanê Girdî ra %20 erjanî reyde îstîfade bikê.

'Ez wazenê ke nê tewir xizmetî dewam bikê'

Cinîyê ke JINKART girewto îfade kerd ke ê xizmetanê Şaredarîya Şaristanê Girdî ra keyfweş ê. Rojda Can ke va a keyfweş a ke JINKART girewto wina qisey kerd: "Mi muraceatê JINKARTî kerdbî. Mi JINKARTê xo girewt. Sipas şaredarîya ma rê. Ez wazena ke nê tewir xizmetî dewam bikê."

Melîha Yuksel va: "Mi şaredarîya xo rê muraceat kerdbî. Venga mi da. Ez ameya tîya mi JINKARTê xo girewt. Ez wazena ke heme cinîyî îstîfade bikê. Ez sipasê şaredarîya xo kena. Homa razî bo. Nika kartê mi destê mi de yo" 

Hatun Alkay ke waşt ke seba cinîyan projeyê hîna rindî dewam bikê, tetbîqê JINKARTî rê sipasê şaredarîya şaristanê girdî kerd.

Leyla Gokdeniz ke keyf kena ke JINKARTî girewto hîsê xo wina ardî ziwan: "Mi tetbîqê JINKARTî rê ke Şaredarîya ma ya Şaristanê Girdî pêşkêş keno, muraceat kerd. Muraceatê mi qebul bî. Ma zaf sipasê Hemşaredaranê Şaredarîye û xebatkaranê şaredarîye kenê. Ma wazenê ke xebatê înan dewam bikê."

'Ez seba xizmetan sipasê şaredarîye kena'

Nazlican Seçkin ke dîyar kerd a Amed de ciwîyena wina va: "Mi tetbîqê JINKARTî yê Şaredarîya Amedî ya Şaristanê Girdî dî û mi muraceatê xo kerd. Muraceatê mi qebul bî. Ez zaf keyf kena. Ez sipasê Şaredarîya Amedî ya Şaristanê Girdî kena."

Azîze Arslan zî wina qisey kerd: "Ez şîyêne nexweşxane. Mi 200-300 TL dekerdêne karta xo û hewteyêk pê şîyêne. Ez keyf kena ke JINKART vejîya. Ez zaf sipasê Şaredarîya Şaristanê Girdî kena ke nê xizmetî ma rê pêşkêş kenê."