Hemşaredara Şaredarîya Amedî ya Bajarê Girdî Serra Bucak, bale ant muhîmîya têhetameyîşî ser o ke nirxê muşterekî ser o yo û va ke ê do seba ke kombîyayîşê meclîsî şarî rê akerde bibê, xebate bikê.

Meclîsê Şaredarîya Bajarê Girdî, roniştişê hewtine yê kombîyayîşê adeyî yê aşma Teşrîna Peyêne kerd. Roniştişi de ke bi serekiya Hemşaredara Şaredarîya Bajarê Girdî Serra Bucak Salonê Meclîsî de virazîya, endamê meclîsî beşdar bîyî.

Hemşaredara Bucakî ke destpêkê kombîyayîşî de qisey kerd, dîyar kerd ke ganî kombîyayîşê meclîsî hîna beşdargir û zafî bo û nê çîyî qeyd kerdî: "Ma wexto ke naye vanê, ma behsê prosesêk kenê ke tede şar wayîrê veng û îradeyî yo. Coka ez kombîyayîşê meclîsî yê hewteyê vîyarteyî ke teber ra û akerde virazîya, zaf muhîm vînena. Ez wazena tîya ra vaja ke ma do seba dewamkerdişê naye xebate bikê. Ez wazena yew xemgînîya xo zî vaja. Grûba Meclîsî ya AK Partî, serekê şaredarîyan û endamê meclîsî, roniştişê akerdeyî de hetê ma de nêbîyî. Merdim wazeno ke 8 serranê xesbkerdişê qeyyûmî ra dima, nika zî tayînkerdişê qeyyûman seba şaredarîyanê Esenyurt, Colemêrg, Mardîn, Batman û Xelfetî, ma seba prosesêk ke hetê şaranê Tirkîya û partîyanê sîyasîyan ê cîya-cîyayan ra ameyo mehkumkerdiş, nê meclîsî de ma nêeşkenê têreyde bê, ma nêeşkenê têreyde paştî bidê yewbînan, mo ma zaf dejneno. Çunke nê xesbê heqî ke ma rê beno, do meşte ê bînan rê, do meşte îqtîdarî bi xo rê bibo. Şarî tarîxê Tirkîya yê 100 serrî de nê prosesî dîyî û ciwîyayî. Meclîsê ma di grûbê ci est ê. Ma wazenê ke Grûba AK Partî de zî, wa prosesêk bibo ke tede ma paştî danê yewbînan, yenê têhet û her firsend de îfade kenê ke qeyyûm tetbîqêko şaş o. Peynî de ma bi Şannguş, Hezro, Çêrmug û Gêlî reyde yew bajar ê, nirxê ma yê muşterekî est ê. Eke ma wazenê ke ma nê nirxanê muşterekan ser o bêrê têhet û paştî bidê, eke ewro ney, key? Eke ma ewro nirxanê demokratîkan nêpawê ma key do bipawê?"

Kombîyayîşê meclîsî de dima madeyê rojeve ameyî girewtene.