Şaredarîya Şaristanê Girdî û 3 şaredarîyê qezayan, seba 132 taximanê ke 16 branşanê klubanê sporî yê amatoran  de kay kenê 9 mîlyon TL hetkarîya pereyî daye. Hemşaredarê Şaredarîya Şaristanê Girdî Dogan Hatunî dîyar kerd ke serra newa de seba viraştişê tesîsanê sporî do game bêro eştene û va "Eke ma pîya hereket bikê ma şênê bajarê xo waranê mîyanneteweyîyan de temsîl bikê."

Şaredarîya Şaristanê Girdî Serekîya Daîreya Xizmetanê Ciwanî û Sporî û şaredarîyê qezayanê Baglar, Yenîşehîr û Kayapinarî çarçeweya xebatanê xo de klubanê sporî yê amatoran ke bajar de est ê, înan rê 9 mîlyon hetkarîya pereyî daye. Derheqê mesela de bi beşdarîya Hemşaredarê Şaredarîya Şaristanê Girdî Dogan Hatunî, Merkezê Kultur û Kongre yê ÇandAmedî de kombîyayîşêk organîze bî.

Kombîyayîşî de Hemşaredar Hatunî ra teber, Hemşaredara Şaredarîya Kayapinarî Berîvan Gulşen Sîncar, Hemşaredarê Şaredarîya Baglarî Leyla Ayaz û Sîrac Çelîk, Hemşaredarê Şaredarîya Yenîşehîrî Mehmet Ergun, Serekê Federasyonê Klubanê Sporî yê Amatorî yê Amedî (ASKF) Remzî Dayan, endamê heyetê îdareyî û îdarekerdoxê Komela Antrenoranê Futbolî ya Tirkîye (TUFAD) Hanîfî Akkaya beşdar bîyî.

16 branşan de 132 taximan rê hetkarî ameye dayene 

Hemşeredar Hatunî ke kombîyayîşî de qisey kerd qeyd kerd ke seba klubanê sporî yê amatorî û taximanê branşî butçeyê 3 şaredarîyan ameyo şuxulnayene. Hatunî dîyar kerd ke çarçeweya xebatan de ke Serekîya Daîreya Xizmetanê Ciwanî û Sporî û şaredarîyê qezayan benê, 16 branşan de 132 taximan rê hetkarîua butçeyî ame kerdene û wina va: "Dîyayîşê hemîne şaredarîyanê ma yê Partîya DEMî yê spor ser o o yo ke spor ganî bibo cayê ciwîyayîşî yê heme însanan bêke 'la' bêro vatene û wa aştî, dostî û biratî bibo. Na gamêk a ke ma seba hîrakerdişê hemîne qadanê sporî erzenê."

'Ma planê butçeyî viraşt'

Hemşeredar Hatunî dîyar kerd ke Şaredarîya Şaristanê Girdî 6 mîlyon, qezayê bînî zî 3 mîlyon hetkarî kenê û wina qisey kerd: "Bajarê ma de bi des hezaran ciwanî estê û her sewîye de ciwan nêeşkenê şêrê qadê sporî yo ke ê wazenê. Ma bi şaredarîyanê qezayan pîya tesbît kerd ke problemê binawanî est o û ma na serdeme de planê xo yo stratejîkî de ca da ci. Heme qadê ma ameyê devirkerdene, binawanî yê ma yê mewcudî bes nîyê, seba ke ma cayê ke ameyê dewrkerdene, bigîrê ma sereyê xo da Mudirîyetê Wîlayetî ya Ciwanî û Sporî û dadgehan. Prosesê dadgehî dewam keno. Ma çira nê cayan wazenê? Emser 10 hezarî ra vêşêr ciwanî est bî ke wazenê şêrê unîversîte û şêrê BESYOyî û sey qadanê nîyanenan, çinbîyayîşê tesîsanê ma yê mewcudî, çinbîyayîşê binawanîya ma maxdurîyetanê zaf cidîyan virazeno. Ma planê stratejîkî yê 5 serran de seba binawanîye planê butçeyî viraşt. Ma reyna dewam kenê ke waştişanê sporkeranê maxduran yê starbîyayîşî û waştişanê bînan temîn bikê."

'Ma şênê bajarê xo waranê mîyanneteweyan de temsîl bikê'

Hatunî melumat da ke ê do verê cinîyan de seba heme şarê ke wazenê biresê sporî, înan rê paştî bidê û dewam bikê û qeyd kerd ke serra newa de seba viraştişê tesîsê sporî do Qarakoprî û cayêko ke do dîyar bikerê û game bêro eştene. Hemşeredar Hatunî veng da yewînanê spor-bingeyî û va: "Bajarê ma yew bajarê sporî yo, bi des hezaran ciwanî est ê. Nê bajarî de sporkerê zaf başî şênê bêrê weyekerdene. Ma ewro 16 branşan rê hetkarî kerd la ma amadeyê hetkarîkerdişê branşanê bînan zî. Eke ma pîya hereket bikê ma şênê bajarê xo waranê mîyanneteweyî de temsîl bikê. Ma hêvî kenê ke sporkerê başî bêrê weyekerdene."

'Ma ganî ciwanan hîna vêşî teşwîqê sporî bikê'

Serekê ASKFyî Remzî Dayanî zî sipasîya xo kerd heme kesê ke kedê înan vîyarto û va: "Ma pîya xebatêka xorîne kerde. Şaredarîyê ma, bi hemîne tahrîbat û bêîmkanîyan, butçeyê xo teng kerd. Seba ma çîyo ke peyda nêbeno, tesîs o. Bajarê ma de qadê zaf cidî est ê ke sey madeyê hişberî ciwanan benê rayîrê xirabî; coka ma ganî ciwanan hîna vêşî teşwîqê sporî bikê."

Badê qiseykerdişan Serekê ASKF’yî Remzî Dayanî, seba hetkarîya ke klubanê sporî yê amatorî rê ameye dayene, plakete daye Hemşaredar Hatunî.

Programî de Sekreterê Pêroyî Emrullah Gorduk, Hetkarê Sekreterê Pêroyî Reşat Bakan, serekê daîreyan û endamê meclîsî zî Hemşeredar Hatunî reyde bî.