Şarî dîyar kerd ke ê xizmetê resê pêroyî yê Şaredarîya Amedî ya Şaristanê Girdî ra ke Farqîn de 24 dewan û 12 hezar nifusî gêno xo mîyan, kêfweş ê û va "Ma seba ke problemê resî ame safîkerdene zaf şa yê."

Serekîya Daîreya Resî ya Şaredarîya Şaristanê Girdî, merkezê bajêr û qezayan dewan de zî seba xizmetê resê pêroyî xebatanê xo dewam kena. Di rayîranê resê pêroyî yê neweyan ke qezaya Farqînî de 24 dewe 12 hezar nifusî gênê xo mîyan, tede 2 otobusî 2ê Kanûne de dest bi xizmetê şarî kerd.

24 dewî ke gênê xo mîyan di rayîranê resê pêroyî yê 85 kîlometreyî de di otobusê ke wezîfedar ê, merkezê Farqînî ra dest pêkenê û mîyanê hefte de her roje saete 06:00 ra heta 17:30 mabênê dewan de xizmetê şarî kenê.

'Şaredarîya ma karêko zaf weş kena'

Yasemîn Yildirim ke va ez xizmetê resî ra kêfweş a, bale ant ke Şaredarîya Şaristanê Girdî karanê weşan kena û wina dewam kerd: "Erebeya her kesî çin a, coka şar zaf kêfweş o. Înşalah no dewam keno. Ez vînena ke şaredarîya ma na mesela de karêko zaf weş kerdo. Ez hêvî kena ke çîyê hîna weşî do bêrê. Ma zaf kêfweş ê, zaf sipas kenê."

'Erebeyê ma çin bî'

Ramazan Saglamî ke dîyar kerd şaro ke erebeya ey çin a zehmetî anceno, derheqê xizmetê şaredarîye de wina qisey kerd: "Verê otobusê ma çin bî, nika seferê otobusan dest pêkerd û xizmet danê şarî. Ma şaredarîye ra kêfweş ê, Heq razî bo. Erebeya zaf kesan çin a û Farqîn merkezî ra 25-30 kîlometreyî dûrî yo. Ma na xizmet rê zaf sipas kenê."

Hasîne Yildirima ke kêfweşîya xo arde ziwan wina qisey kerd: "Ma Şaredarîya Şaristanê Girdî ra zaf kêfweş ê. Ardimê înan zaf reseno ma. Wexto ke erebeyê ma çin bî ma zaf zehmetî antêne. Kesê ke nêweşîyê înan ê kronîkî est bî, seba ke erebe çin bî ê nêeşkayêne şêrê ca. Ma seba ke Şaredarîya Şaristanê Girdî erebe ruşna zaf kêfweş ê. Heq razî bo, sipas kenê."

'Ez sipasîya xo kena heme kesan rê ke keda înan est a'

Muxtarê Dewa Bereketlî Îbrahîm Yildirimî nameyê Dewa Bereketlî ser o sipasîya xo kerde heme kesan rê ke keda înan est a. Yildirimî va: "Şarê ma est o ke rewşa ey bes nîya, wendekarî û kesê ke erebeya înan çin a. Ma seba ke problemê resî ame safîkerdene zaf şa yê û ma wazenê ke no dewam bikero. Heta nika şaro ke dewe de ciwîyeno bi dolmuşan şîyêne keye, şarê ma est o ke nêeşkayêne heta keye şêro-bêro û seba krîzê ekonomîkî heqê resî zaf giran ameyêne. Coka no xizmet weş bî."

Muxtarê Dewa Eşme Mehmet Şîrînî zî seba seferanê otobuse sipas kerd û va ganî xizmetî dewam bikerê.