Şaredarîya Amedî ya Şaristanê Girdî zabitnameyê Serekîya Daîreya Xizmetê Astengdar û Pîran hazir kerd û lansman da. Temsilkarê komel û rêxistinanê sivîlan, zabîtname rê desteg da û va "Ma do nê rayîrî de bibê".

Lansmanî de Hemserekê DEM Partî Tuncer Bakirhan, Hemşaredarê Amedî Serra Bucak û Dogan Hatun, Hemşaredarê Wanî Neslîhan Şedal û Abdullah Zeydan û temsîlkarê komelê astengdaran beşdar bîyî. Hemşaredaran zabîtname temsîlkaran reyde pare kerd.

Serekê DTSO’yî Mehmet Kayayî va ke kotaya %3 yê astengdaran rê kar nêyeno dayene û ganî rayberîya bajarî nê warî de tedbîr bigîro. Ey va ke ganî astengdarî spor bikê û beşê sporî bêro awankerdene.

Serekê Komela Şeş Nuqtayî ya Koranê Amedî Akîf Karakaşî zî zabitname ra memnunîyetê xo îfade kerd û va ke kêmanîyê ci çin o. Karakaşî va ke ganî kursê perwerdeyê meslekî bêrê dayene û resayîşê karî asan bibo.

Serekê Komîsyonê Astengdaran yê DÎSKî Ûfûk Gurbuzî kêfweşîya xo îfade kerde û va ke ê do taqîp bikerê ke zabîtname senî yeno tetbîqkerdene."