Şaredarîya Amedî ya Şaristanê Girdî seba caardişê berhemê ziraetî û heywandarîye projeyan viraşto û 6 hezar û 500 citekaran nê projeyan ra îstîfade kerdo.

Serekîya Daîreya Xizmetanê Dewan, seba ke berhemê ziraetî û heywandarîye bêro caardiş û erd bi awe bêro pêresnayîş projeyê 76 mîlyon TLyî viraşto. 6 hezar û 500 citekaran nê projeyan ra îstîfade kerdo.

'Ma 40 Kîlometre Kanalê Awedayîşî Viraştî'

Serekê Daîreya Xizmetê Dewan Velat Ozerî derheqê xebatan de agahdarî da û va ke înan bi protokolê ke Serekîya Îdareyê Averşîyayîşê GAP’î reyde kerdo, 40 kîlometre kanalê akerde û girewteyî viraşto. 

'Ma Ganîyanê Tebîetî Zî Fikirîyayî'

Ozerî dîyar kerd ke 1500 citekarî nê kanalan ra îstîfade kenê û va: "Ma wexto ke nê kanalî viraştî, ma ganîyanê tebîetî zî fikirîyayî. Dinya de krîzê hewayî est o û no krîz krîzê werdî zî ano meydan. Ma nê kanalî bi awa çimeyan viraştî ke tebîet zerar nêvîno."

'Armancê Ma yo Bingeyin Kemero Kesk o'

Ozerî qiseykerdişê xo wina dewam kerd: "Ma seba ke 2 hezar citekarî 7 hezar dorî erd de ekonomîya herême xurt bikerê, Pasûr, Pîran û Erxenî de kanalê akerde û girewteyan virazenê. Ma do Çêrmûg û Şankûş de zî 17 taxan de 2 hezar û 500 donim erdî de kanalanê awedayîşî virazê û 3 hezar citekarî do nînan ra îstîfade bikerê. Armancê ma yo bingeyin viraştişê kemerê keskî yo. Bi no hewa ma wazenê şarê ma agêro dewan û berhemanê organîkî bigîro."

'6 Hezar û 500 Citekarî Do 76 Mîlyon TL Sermîyanî Ra Îstîfade Bikerê'

Ozerî va ke Îdareyê GAP’î reyde çar projeyê înan ê 76 mîlyon TLyî est ê û 6 hezar û 500 citekarî do nê projeyan ra îstîfade bikerê. Bi nê projeyan hem do ekonomîya herême xurt bibo hem zî şar do agêro dewe.

'2025 Do Bibo Serra Xizmetan'

Ozerî va ke ê do 2025 de hîna zaf xizmet bikerê û citekaran reyde berhem bigirê. Ey dîyar kerd: "2025 de ma do dewan de hîna zaf xizmet bikê û ziraet û heywandarîye aver berê."

Ey peynî de veng da şarê dewe ke wa awe bi tasaruf bixebitno. Ozerî va: "Krîzê hewayî krîzê awe zî ano meydan. Seba coy ganî şarê ma awe bi hawayêko rind bixebitno."