Mudirîya Pêroyî ya DÎSKÎ, qezaya Çêrmûge de problemê awa 3 mezrayan ke nifûsê înan 950 o, safî kerd. Şarê mezrayan vano "Ma bi serran problemê awe ancêne. DÎSKÎ ame xebate kerd, xetî neweyî akerdî. Nika awa ma rind yena."

DÎSKÎ Taxa Încîllî de Mezraya Dallîkaya ke 500 nifûs û 122 keyeyî ya û Mezraya Başdonmez ke 150 nifûs û 40 keyeyî ya, tede qasê 650 kesan rê awa şimitişî resna. Ekîban dima Mezraya Adalaran a ke girêdayeya Taxa Kuşlukçayirî ya de xebate kerde û meseleya awa şimitişî safî kerde.

Mudirê Şefîya Çêrmûge ya DÎSKÎ Yunus Kayişogluyî va ke Mezraya Adalaran de ke 300 nifûs û 40 keyeyî ya, debîyê awayî sanîye de 0.5 lîtreyan ra kerd 1.5 lîtreyî û xetê awayê şimitişî yo 2 hezar û 300 metreyî newe ra viraşt.

Şarê Mezraya Dallîkaya Besra Şen va "Bi serran o awa ma çin bîye. Darê ma, cayê ma yê keskî huşk bîbî. Nika zimistan o la awa ma yena." Remzîye Evcen zî va "Ma nêeşkayêne xo pak bikerê. Ma nêeşkayêne makîneyanê cilşutişî û firaqan bişuxulnê. Heywanê ma est bî, ê zî bê awe mendêne. Ma înan rê 3 kîlometreyî dûrî ra awe ardêne."