Hemşaredarê Şaredarîya Amedî ya Şaristanê Girdî Serra Bucak û Dogan Hatun, têkilîyanê xo yê Enqera de Ofîsê Koordînatorîya Muqîm a NY û temsilkarê UNICEF’î yê Tirkîya reyde dîyar kerdî.

Hedefê dewamkerdişî ameyî qalîkerdiş

Pêvînayîşo de ke Koordînatorê Muqîm ê NY yê Tirkîya Babatunde A. Ahonsî reyde ame kerdene, hedefê bingehînî yê Planê Stratejîk ê 2025-2029 yê Şaredarîya Amedî ya Şaristanê Girdî ameyî destgirewtene. Pêvînayîşî de hedefê verênî sey averşîyayîşê sosyalî, têkoşînê vurîyayîşê hewayî, projeyê binawanî, averşîyayîşê ekonomîkî û seypêyîya komelkî û tetbîqkerdişê nê hedefan bi wasitayanê averşîyayîşê dewamkerdişî yê cayê herêmkî ameyî qalîkerdiş.

Hemkarîya UNICEF’î 

Hemşaredaran dima temsilkarê UNICEF’î yê Tirkîya Paolo Marchî reyde pêvînayîş kerd û babetê hemkarî û projeyê hemparî ser o vindertî. Kombîyayîş de seba beşdarîya aktîfe ya projeyanê UNICEF’î, dayîşê destegê teknîk û malî yê projeyanê ke est ê, bihêzkerdişê hemkarî qerar ame girewtene.

Marchî îfade kerd ke ê do nêzdî de heyetêkê teknîkî bierşawê Amed û gamê şênber yê hemkarîya projeyî do bêrê eştene. Ame dîyarkerdiş ke Amed do hemkarîyanê seba fonkerdişê projeyanê sektorê taybetî de ca bigîro û sey “bajarêkê domanan” cayêko taybet UNICEF’î de ca bigîro. 

Pêvînayîş sey gamêka muhîme ame nirxnayene ke do projeyanê ke kalîteya ciwîyayîşê doman û ciwanan zêde kenê, bi lez cayê cuye de bêrê tetbîqkerdiş.