Şaredarîya Amedî ya Şaristanê Girdî, Merkezê Şêwirmendî û Perwerdeyê Girêdayîşê Madeyan ke do kesanê tîryakan û keyeyanê înan rê piştî bido, akerd.

Serekîya Daîreya Xizmetê Sosyalî seba ke şiûrê berpirsîyarîya komelkî ya derheqê madeyîye de zêde bibo û kesanê tîryakan û merdimê înan rê piştîya psîkososyal bido, Merkezê Şêwirmendî û Perwerdeyê Gireêdayîşê Madeyî û Keyeyê kerrayî yê Qada Ciwîyayîşê Pîyayî ya Sumerpark de akerd. Merasîmê akerdişî de Hemşaredarê Şaredarîya Şaristanê Girdî Serra Bucak û Dogan Hatun, serekê daîreyan, hemşaredarê qezayan, rêxistinê sivîlanê ke nê warî de xebatî kenê û temsilkar û endamê partîyanê sîyasîyan beşdar bîyî.

Serekê Daîreya Xizmetê Sosyalî Serap Yildirim qeyd kerd ke nê xebatî rê butçeyê zaf muhîm dîyayo û va "Tîya de do reyna destpêkerdiş mumkin bo û ma do nê têkoşînî de kesêkî tena nêverdê."

Hemşaredare Bucak qiseykerdişê xo de ard vîrardene ke ê 2014-2015 de Merkezê Hevra û çend merkezê bînî akerde bîyî la ameyî padayîş. Aye va "Eke nê merkezî nêameynê padayîş, rewşe ewro hende giran nêbîyênê." Aye va ke ê 4 pisporan reyde dest bi xebate kenê û wazenê ke nê xebatî hîna bikê gird. Hemşaredare Bucak va ke ê do domanan û ciwanan bi merkezanê spor û hunerî reyde bîyarê têhet.