Mudirîya Pêroyî ya DÎSKÎ ya Şaredarîya Amedî ya Şaristanê Girdî, merkezê bajarî de 16 cayanê cîyayan de bi borîyanê tîpê Korege ke pêt ê, emrê înan derg o û vera kîmyasalan vindenê, borîyê kanalîzasyonî newe ra ronayî.

Mudirîya Pêroyî ya DÎSKÎ seba modernîzasyon û weşkerdişê kalîteya ciwîyayîşê bajarî xebatanê xo dewam kena.

Serekîya Daîreya Kanalîzasyonî ya girêdayeya DÎSKÎ seba ke standardê weşîya derûdorî berz bikero xebitîyena û bajarî de cayê ke tede awanîyê neweyî virazîyayê û cayê ke xirabîyayê, tede bi diqqet xebatanê kanalîzasyonî dewam kena.

16 cayan de xebatî qedîyayî

Heta nika xebatê xurtkerdişê binawanîya kanalîzasyonî yê DÎSKÎ 16 cayanê cîyayan ê bajarî de qedîyayî. DÎSKÎ sîteyanê neweyan ke tede bi seyan keyeyî est ê, programê xebate de ca dayo û nê cayan de binawanîya kanalîzasyonî bi borîyanê tîpê Korege (300 HDPE) virazena.

Ekîbê DÎSKÎ seba ke standardê weşîya derûdorî berz bibo, cayê ke borîyê kanalîzasyonî vejîyenê tede locinê hewayî ronenê. Locinî do sîstemê kanalîzasyonî rê sîrkulasyonê hewa peyda bikerê.

15 rojî yo ke DÎSKÎ Qezayanê Kayapinar, Yenîşehîr, Baglar û Sûrî de xebata girêdayîşê newe û tamîrê xetanê kanalîzasyonî kerde.