Hemşaredar Şaredarîya Amedî ya Şaristanê Girdî Dogan Hatun beşdarê nobedarîya ke vera cezaya ke dîyaya Hemşaredarê Şaredarîya Wanî ya Şaristanê Girdî Abdullah Zeydanî ra ver vera awanîya şaredarîye de dest pêkerd, bî û va "Şar wayîrê îradeyê xo vejîyeno, vindertişê şima yê tîya de cewabêko zaf xurt dano."

Dima ke Hemşaredarê Şaredarîya Wanî ya Şaristanê Girdî Abdullah Zeydanî rê cezaya 3 serrî û 9 aşmî ameye dayene, vera şaredarîye de nobedarî dest pêkerde. Bajar de ke germîya hewa hetanî binê 10 dereceyan kuwena, nobedarîya ke vera şaredarîye de dest pêkerda heta şafeqî dewam kerde.

Hemşaredarê Şaredarîya Amedî ya Şaristanê Girdî Dogan Hatun, Hemşaredara Şaredarîya Dêrsimî Birsen Orhan ke cayê aye de qeyyum tayîn bîyo û Hemserekê Yewîya Şaredarîyanê Başûrê Rojhelatê Anadolî (GABB) Sirac Çelîk beşdarê nobedarîye bîyî. Hemşaredar Hatun ke heta şafeqî şarî reyde vera şaredarîye de vindert, şarî reyde kewte govende.

Hemşaredar Hatun: Vindertişê şima cewabêko zaf xurt dano

Hemşaredar Dogan Hatunî nobedarîye de qisey kerd û va ke a selamê heme şarê Amedî ardî û wina dewam kerd: "Îradeyê kurdan pêro nika tîya der o. Şar wayîrê îradeyê xo vejîyeno, vindertişê şima yê tîya de cewabêko zaf xurt dano. Vengê şima şêro înan: Seke 31ê adare de nê şarî senî cewab da înan, senî wayîrê erdê xo vejîya, senî wayîrê ziwanê xo vejîya, senî wayîrê kulturê xo vejîya, ewro zî wayîrê îradeyê xo vejîyeno. Bi seyan rey weş û war bê. Eke şarê kurdî seba îradeyê xo werzo pay, qet yew hêz nêeşkeno vera ey de vindero. Şima weş zanê şima vera xover dayo, reyna xover danê. Wa ancîna bizanê ke şarê kurdî heme bajaranê xo de ancîya do xover bido."