Hemşaredara Şaredarîya Amedî ya Şaristanê Girdî Serra Bucak, seba 8ê adare Roja Cinîyan a Dinya personelanê cinîyan yê şaredarîye reyde ameye têhet û va "Ganî ma cayê cinîyan, cayê ke cinî yenê têhet, qisey kenê, zêde bikê."

Meclîsê Cinîyan ê Şaredarîya Amedî ya Şaristanê Girdî, bi munasebetê Roja Cinîyan a Dinya ya 8ê adare do karkeranê cinîyan ê beşanê şaredarîye reyde bêro têhet. Na çarçewa de têhetameyîşo verên bi beşdarîya Hemşaredare Serra Bucak Qezaya Kayapinarî de yew ca de virazîya. Bucak dîyar kerd ke ganî cinî xebatanê xo gird bikerê û hîna zêde bêrê têhet. Bucak wina dewam kerde: "Wextêk ke têkoşîna cinîyan tenê bêra war vera hêzê ke ma ver de yo, zîhnîyetê camêrdanê dekewtoxan bi taybetî zî cayê şarî de, cayê ke ma tede xebitîyenê, her cayê cuya ma de ke ma wazenê tede bibê, her ca de ke cinî wazenê vengê xo awan bikerê, ma pê reyde rî bi rî yê." Hemşaredare va ke ê gurewtişê qeyyuman ra dima reyna sey cinîyan xurt ê û îfade kerd ke ganî cinî wayîrîye emegê nê têkoşînî bivejîyê.